Əl-Əzhərin zəkatın Qəzzə xalqına verilməsi ilə bağlı yeni fətvası
“İQNA”, “Ərəbi 21” saytına istinadən xəbər verir ki, Misir Darul-İftası Qəzzə zolağındakı şəhid ailələri arasında zəkatın paylanması ilə bağlı yeni fətva verib.
Mərkəz öz rəsmi “Facebook” səhifəsində “Qəzzə şəhidlərinin ailələri arasında zəkatın paylanmasının hökmü nədir?” sualına cavab olaraq bildirib:
“Zəkatın əsas məqsədi insanları dirçəltmək, onların həyat ehtiyaclarını təmin etməkdir. Əgər məsələ insan həyatını qorumaq, aclıq, susuzluq və xəstəlik təhlükəsi ilə mübarizə aparmaqla bağlıdırsa (Qəzzə xalqında olduğu kimi), o zaman İslam şəriətinə görə zəkatın onlara ayrılması və göndərilməsi caizdir və bunda heç bir irad yoxdur.”
Açıqlamada əlavə edilib: “Bu iş yalnız rəsmi, qanuni və təsdiqlənmiş kanallar vasitəsilə həyata keçirilməlidir ki, vəsaitin həqiqətən də haqq sahiblərinə çatdığına əmin olmaq mümkün olsun.”
Son rəsmi məlumata görə, Fələstin Səhiyyə Nazirliyi bazar ertəsi günü bildirib ki, İsrailin 7 oktyabr 2023-cü ildən bəri Qəzzəyə qarşı təcavüzü nəticəsində şəhidlərin sayı 67.869, yaralıların sayı isə 170.105 nəfərə çatıb.
Nazirlik bildirib ki, son 24 saat ərzində xəstəxanalara 63 şəhidin cəsədi gətirilib — onlardan 60-ı dağıntılar altından çıxarılıb. Həmçinin bu müddətdə 39 nəfər yaralanıb. Nazirlik vurğulayıb ki, hələ də dağıntılar altında və küçələrdə qalan qurbanlar var və hazırda təcili yardım və mülki müdafiə qüvvələri onlara çata bilmir.
ABŞ prezidenti Donald Tramp cümə axşamı günü bəyan edib ki, İsrail işğalçı qüvvələri və Həmas arasında Türkiyə, Misir və Qətərin vasitəçiliyi, eləcə də ABŞ-ın nəzarəti altında Şərm əş-Şeyxdə aparılan dolayı danışıqlardan sonra onun atəşkəs və əsir mübadiləsi planının birinci mərhələsi üzrə razılıq əldə olunub.
2023-cü il oktyabrın 8-dən bəri ABŞ-ın dəstəyi ilə İsrail işğalçı ordusu Qəzzədə iki ildir ki, soyqırım törədir – o cümlədən kütləvi qətllər, aclıq, dağıntı və məcburi köçürmə həyata keçirir və beynəlxalq ictimaiyyətin, eləcə də Beynəlxalq Ədalət Məhkəməsinin əmrlərini tamamilə görməməzlikdən gəlir.
Şəhid və yaralıların çoxu qadınlar və uşaqlardır. Bu soyqırım nəticəsində 9500-dən çox itkin, yüz minlərlə məcburi köçkün və aclıqdan əziyyət çəkən fələstinli qalıb; aclıq 463 fələstinlinin, o cümlədən 157 uşağın həyatına son qoyub.
4310671
