Keniya müsəlmanları Fələstin xalqına dəstək nişanəsi olaraq minlərlə ağac əkdi
“Eastleighvoice” saytının məlumatına görə, Keniya müsəlmanları həm ekoloji, həm də siyasi xarakter daşıyan bu təşəbbüsdə Fələstin xalqının şərəfinə Nayrobi şəhərinin Uhuru parkında 10 min ağac əkiblər. Ölkənin “Fələstin üçün səslər” (“Voices for Palestine”) adlı qrupunun təşkil etdiyi bu böyük ağacəkmə tədbirində çoxsaylı insanlar iştirak edib. Tədbir mərkəzi parka qədər uzanıb və məqsəd Fələstin xalqı ilə həmrəyliyi nümayiş etdirmək, həm də 1917-ci il noyabrın 2-də verilmiş Balfur bəyanatının ildönümünü yada salmaq olub — bir çoxlarının fikrincə, bu bəyanat fələstinlilərin iztirablarının başlanğıc nöqtəsidir.
Təşkilatçılar və iştirakçılar 10 min ağac əkərək bunu xatirə, müqavimət və yenilənmə rəmzi kimi təqdim ediblər. Bu ağaclar, məcburi köçkünlük, işğal və zorakılıqla üzləşmiş fələstinli nəsillər üçün canlı bir xatirə abidəsi olacaq. Həmçinin bu təşəbbüs Keniya dövlətinin meşə örtüyünü artırmaq və ictimai yaşıllıqları bərpa etmək məqsədi ilə uyğunluq təşkil edir.
Nayrobi Mərkəzi Məscidinin (Jama Masjid) şeyxi Bədr Cəfər çıxışında bildirib ki, bu toplantı həm mənəvi, həm də ekoloji bir addımdır. O, qeyd edib ki, ağac əkmək təkcə ətraf mühitin qorunmasına xidmət etmir, həm də ədalət və qlobal sülhə çağırışdır.
Şeyx Bədr əlavə edib: “Bu, sadəcə ağac əkmək deyil; bu, ədalət üçün qlobal bir çağırışdır.”
Təşkilatçıların sözlərinə görə, 2 noyabr tarixi məhz Balfur bəyanatının ildönümünə təsadüf etdiyinə görə seçilib. Onlar bildiriblər ki, bu tarixdə ağac əkməklə iştirakçılar Keniyanın ekoloji səylərini insan hüquqları uğrunda qlobal mübarizə ilə əlaqələndirirlər.
Tədbirin məqsədlərindən biri də Qəzza zolağı və Fələstinin digər bölgələrində davam edən humanitar böhranlar barədə ictimai məlumatlılığı artırmaq olub. Bir çox iştirakçılar sülh və ədalət tələb edən plakatlar və bannerlər daşıyır, bəziləri isə münaqişələrdə həyatını itirənlərin ruhuna dua edirdi.
Natiqlər ümid ediblər ki, əkilən ağaclar sülhün və dözümlülüyün qalıcı rəmzinə çevriləcək. Onlar vurğulayıblar ki, Fələstin üçün ədalət yalnız regional və ya siyasi məsələ deyil, qlobal prioritet olaraq qalmalıdır.
Şeyx Bədru və digər dini liderlər Keniya müsəlman icmasını və bütün vətəndaşları sülhün yaradılması və humanitar fəaliyyətlərdə davamlı iştiraka çağırıblar. Onlar insanları imana əsaslanan təşəbbüsləri sosial məsuliyyətlə birləşdirən layihələrdə fəal olmağa təşviq ediblər.
2023-cü ilin oktyabr ayından bəri Qəzzada zorakılıq kəskin şəkildə artıb. UNICEF-in məlumatına görə, bu müddət ərzində azı 61 min uşaq Qəzzada ya həlak olub, ya da şikəst edilib; bu isə orta hesabla hər 17 dəqiqədə bir uşağın zərər çəkməsi deməkdir. Onların çoxu hava hücumları və quru əməliyyatları nəticəsində psixoloji travma alıb, valideynlərini itirib və ya evlərindən didərgin düşüb.
4314520
