Konqresdə müsəlman nümayəndənin Trampa cavabı: “Təhqir və alçaltma bizi qorxutmayacaq”
“İQNA”-nın “Fələstin Əl-An” saytına istinadən verdiyi xəbərə görə, “New York Times” Minnesotadan demokrat nümayəndə İlhaan Omarın məqaləsini dərc edib. O, ABŞ prezidenti Donald Trampa cavab verib. Tramp somali icmasını ştatdan qovmaqla hədələyib, onları “zibil” adlandırıb və iddia edib ki, onlar Amerikaya heç bir fayda vermir, yalnız şikayət edirlər.
İlhaan Omar bildirib: “Tramp yaxşı bilir ki, uduzur. Onun məni və dostlarımı ‘zibil’ adlandırması, onun Social Truth platformasında paylaşdığı son təhqiramiz yazılardan biridir. O, bu platformada həm məni, həm də somali icmasını şeytani göstərir və müxtəlif sui-qəsd nəzəriyyələri yayır.”
O əlavə edib: “İllərdir ki, prezident mənə qarşı nifrət dolu sözlər yayaraq, məni təhqir etməyə çalışır. O, dəfələrlə eyni taktikalara – irqçilik, yad düşmənçiliyi, islamofobiya və parçalanmaya müraciət edib.”
Demokrat nümayəndə vurğulayıb: “Tramp yalnız somalilərə deyil, bir çox digər immiqrantlara, xüsusilə qaradərili və müsəlman immiqrantlara da təhqir yağdırır. O, daim yeni gələnləri alçaltmağa çalışır, amma biz susmayacağıq. O anlamır ki, Amerika somaliləri bu ölkəni necə sevirlər. Biz həkimik, müəllimik, polis əməkdaşıyıq və seçilmiş rəhbərlərik, ölkəmizi yaxşılaşdırmaq üçün çalışırıq. Minnesotada yaşayan somalilərin 90 faizindən çoxu doğum və ya vətəndaşlıq yolu ilə ABŞ vətəndaşıdır. Bəziləri hətta Trampa səs verib, amma o bu həftə dedi: “Mən onları ölkəmdə istəmirəm. Haradan gəlmisinizsə, ora qayıdın.”
İlhaan Omar vurğulayıb: “Somali icması Ağ Evin amansız hücumlarına qarşı hələ də güclüdür. Amerika somaliləri bu hücumlara qarşı möhkəm dayanırlar, amma mən nəticələrindən dərin narahatam. Tramp mənə böhtan atanda, mənim, ailəmin və əməkdaşlarımın aldığı təhdidlərin sayı artır. Hərçənd ki, Konqres üzvü olaraq bu təhdidlər baş verəndə təhlükəsizlik dəstəyindən faydalanıram.”
4321275
