İngiltərədə milyonlarla müsəlman vətəndaşlıqdan məhrum olmaq təhlükəsi ilə üz-üzədir
“İQNA”-nın “Əl-Cəzirə”yə istinadla verdiyi xəbərə görə, iki insan haqları təşkilatı hazırladıqları hesabatda bildirib ki, İngiltərədə milyonlarla müsəlman, hökumətə vətəndaşlığı ləğv etmək üçün verilən geniş səlahiyyətlər səbəbindən vətəndaşlıqdan məhrum olmaq təhlükəsi ilə üzləşib.
Bu hesabat İngiltərədə fəaliyyət göstərən Runnymede Trust adlı irqi ayrı-seçkiliyə qarşı mübarizə təşkilatı və qeyri-hökumət təşkilatı Reprieve tərəfindən hazırlanıb. Hesabatda daxili işlər naziri tərəfindən verilən təxminə görə, təqribən 9 milyon nəfər İngiltərədə qanuni olaraq vətəndaşlığın ləğvi riski altındadır.
Hesabatda qeyd olunur ki, bu rəqəm ölkə əhalisinin təxminən 13 faizini təşkil edir və bu səlahiyyətlər xüsusilə yüksək müsəlman əhalisi olan icmalara qeyri-mütənasib təsir göstərir.
Hesabatda vurğulanır ki, mövcud prosedurlar daha çox Cənubi Asiya, Yaxın Şərq və Afrika icmalarına təsir edir və bu səlahiyyətlər müsəlman icmaları üçün “sistematik təhdid”ə çevrilib.
Hesabatın başqa bir hissəsində qeyd olunur ki, mövcud qanunlara əsasən, bir şəxsin başqa ölkə ilə heç bir real əlaqəsi olmasa belə, həmin ölkənin vətəndaşlığına uyğun hesab edilərsə, İngiltərə vətəndaşlığı ləğv oluna bilər.
Hesabatda bildirilir ki, Pakistan, Banqladeş, Somali, Nigeriya, Şimali Afrika və Yaxın Şərq ilə əlaqəsi olan şəxslər ən həssas qruplara daxildir.
Hesabata görə, hər beş qeyri-ağdərili insandan üçü vətəndaşlıqdan məhrum edilmə riski altındadır, halbuki bu göstərici ağdərili ingilislərdə yalnız bir nəfərə aiddir.
Hesabatda həmçinin vurğulanır ki, 2010-cu ildən bəri “ictimai maraqlar”la bağlı səbəblərə görə 200-dən çox şəxsin vətəndaşlığı ləğv edilib və onların böyük əksəriyyəti müsəlmanlardır.
Hesabatda 2022-ci ildə qəbul edilmiş Vətəndaşlıq və Sərhədlər Qanununa da istinad olunaraq, bu qanunun vətəndaşlığın əvvəlcədən xəbərdarlıq edilmədən ləğv edilməsinə imkan verdiyi qeyd olunur.
Hesabatı hazırlayan iki təşkilat dərhal vətəndaşlığın ləğvinin dayandırılmasını, İngiltərə vətəndaşlıq qanunundakı müvafiq maddənin ləğvini və bu səlahiyyətlər çərçivəsində vətəndaşlığı əlindən alınan şəxslərin hüquqlarının bərpasını tələb edib.
4323361
