Mərhum Şəyşə: "Quran tilavəti" həyatımın missiyasına çevrildi
“İQNA”-nın məlumatına görə, iyunun 23-ü Misirdə "Quran dövlətinin bülbülü" ləqəbli, bu ölkənin Qariələr İttifaqının keçmiş sədri və Məscidül-Əqsada Qurani-Kərimi tilavət edən ilk misirli qari Şeyx Əbül-Eyneyn Şəyşənin vəfatının ildönümüdür.
Bu münasibətlə Misirin Milli Media Assosiasiyasının saytı, Misir radiosunun xəzinəsindən nadir və xüsusi bir müsahibəni yayımlayıb. Bu müsahibə 1984-cü ildə misirli aparıcı Ömər Bətişə tərəfindən "Quran əhli" proqramı çərçivəsində mərhum Şəişə ilə aparılmışdı.
Ustad Şəyşə bu söhbətin əvvəlində bildirib: "Mən 1939-cu ildə, Şeyx Məhəmməd Rifətdən sonra və Şeyx Mustafa İsmayıldan əvvəl Misir radiosuna qoşuldum."
O əlavə edib: "O vaxtlar radio yeni qurulmuşdu və mənim 9 nömrəli lent yazım var idi; onların cəmi 10 lent yazısı (Quran kasetləri) vardı."
Şəyşə bildirib: "Zöhr namazından əvvəl radioya çatırdım və tilavətimin vaxtı olan işa azanına qədər orada qalırdım."
O deyib: "O dövrdə indiki kimi qeydetmə sistemləri yox idi; tilavətlər canlı yayımlanırdı. Buna görə də, mən bütün günü radio binasının içində keçirirdim."
Ustad Şəyşə sözünə belə davam edib: "Quran-i Kərim uşaqlığımdan qanımda axırdı və mən bəzi məclisləri Quran ayələri ilə açırdım. Yaxın dostlarımdan bəziləri atama məsləhət gördülər ki, məni Quran əzbərləmə halqalarına yazdırsın."
O deyib: "9 yaşım olanda atam dünyasını dəyişdi, lakin mən Allahın Kitabı ilə yoluma davam etdim və nəticədə tilavət həyatımın missiyasına çevrildi."
Ustad Əbül-Eyneyn Şəyşə 22 avqust 1922-ci ildə Misirin Kəfrüş-Şeyx şəhərində anadan olub və 10 yaşında Quranı əzbərləyib. Bu misirli qari 23 iyun 2011-ci ildə dünyasını dəyişib.
4359999
