Kosovalı bacıların Quran nəsli yetişdirmək təşəbbüsü
“İQNA”-nın “Müslimun həvləl-aləm” saytına istinadən verdiyi xəbərə görə, Kosovonun paytaxtı Priştinada Renita və Fatimə Nitay adlı iki bacı İslam təhsilində görkəmli örnək kimi seçilib. Onlar Qurana olan həvəslərini yüzlərlə uşağa təlim keçən və yeni nəsil hafizlərlə Allahın kitabına maraq duyan insanlar yetişdirən təsirli bir təhsil layihəsinə çeviriblər.
Bu uğur təsadüfi olmayıb, illərlə Quran elmləri üzrə təhsil və ixtisaslaşma nəticəsində əldə olunub və Kosovoda uşaqlar üçün ən görkəmli Quran təşəbbüslərindən birinə – "Kiçik hafizlər" akademiyasına yol açıb.
Bu bacılar Quran mühitində böyüyüblər və təhsil yoluna Priştina şəhərindəki Kosovo İslam Birliyinə tabe olan Ələddin İslam Məktəbində başlayıblar. Orada onlar Quran elmləri sahəsində fərqlənərək Kosovonu yerli və regional Quran müsabiqələrində təmsil ediblər.
İki bacı təhsillərini Priştina şəhərindəki İslam Araşdırmaları Fakültəsində davam etdirərək magistr dərəcəsi alıblar. 2024-cü ildə onlar əl-Əzhər Universitetindən Quranın on qiraət üzrə icazə (icazətü-l-qiraat) alaraq təhsil həyatlarının ən önəmli mərhələlərindən birini qeydə alıblar.
Hal-hazırda bu bacılar doktorantura təhsillərini davam etdirərək nəzəri bilikləri praktik tətbiqlə birləşdirməyə olan daimi bağlılıqlarını nümayiş etdirirlər.
"Kiçik hafizlər" akademiyası
Uzun illər təhsil və akademik hazırlıqdan sonra bu bacılar Priştina şəhərində, Kosovo İslam Birliyinin nəzarəti altında "Kiçik hafizlər" akademiyasını təsis ediblər. Bu akademiya uşaqlara Quranın düzgün oxunması və əzbərlənməsi üzrə ixtisaslaşmış təhsil platforması kimi fəaliyyət göstərir, yaş fərqlərini və fərdi qabiliyyətləri nəzərə alan tədris proqramlarından istifadə edir.
Akademiya çoxlu sayda uşağı cəlb etməyi bacarıb, fərdi dəstək və uşaqların Qurana olan bağlılıqlarını gücləndirməyə, onların hərtərəfli inkişafını təşviq etməyə kömək edən müxtəlif tədris proqramları təqdim edir.
Bu iki bacının təcrübəsini fərqləndirən məqam onların layihəsinin təkcə əzbərləmə və tilavətdən ibarət olmamasıdır. Bu layihə Quranın gündəlik həyat və praktiki dəyərlərlə əlaqələndirilməsi – uşaqlara doğruçuluq, əmanət, valideynlərə hörmət, əməkdaşlıq və məsuliyyət anlayışları aşılanması üzərində qurulub.
Onlar həmçinin bədii və yaradıcı fəaliyyətləri – rəsm müsabiqələri, əl işləri və uşaqların Quran dəyərləri ilə praktiki və cəlbedici şəkildə bağlanmasına kömək edən mədəni proqramları tədris prosesinə daxil ediblər.
Bacıların səyləri yalnız sinif otağında dərs deməklə məhdudlaşmayıb, Quran təlimini praktiki icma təşəbbüslərinə də çevirib. Uşaqlar xeyriyyə fəaliyyətlərində, ehtiyacı olan ailələri ziyarət etməkdə və həmrəylik, mənsubiyyət və cəmiyyətə xidmət dəyərlərini təşviq edən layihələrdə iştirak edirlər.
Bu yanaşma uşaqların öyrəndikləri Quran dəyərlərini hər gün əmələ çevrilən konkret davranışlara çevirib və bu da cəmiyyətdə geniş etirafa səbəb olub.
Bu təşəbbüs Kosovoda müsəlman qadınlar üçün uğurlu bir modeldir. Onlar ali akademik təhsili, İslami elmləri, tədris işini və ictimai təşəbbüsləri bir araya gətirərək Quran biliklərini yeni nəsillərə xidmət edən praktik layihəyə çeviriblər.
Bu uğur sayəsində "Kiçik hafizlər" akademiyası Quranı əxlaq, mənsubiyyət hissi və sosial məsuliyyətlə birləşdirən nəsil yetişdirmək baxımından İslam təhsili təşəbbüslərinin qabiliyyətinin görkəmli nümunəsinə çevrilib.
4355215
