Şəhid rəhbərin Quran arzusu: Əhməd Əbülqasimin dili ilə
Beynəlxalq qari Əhməd Əbülqasimi şəhid rəhbərin İslam inqilabı yolunda yola salınma mərasimi çərçivəsində “İQNA”-nın müxbiri ilə söhbətində şəhid rəhbərin Quranı-Kərimlə ünsiyyət barədə çoxsaylı tövsiyələrini xatırladaraq bildirdi: "Şəhid rəhbərin buyurduqlarından mənim çıxardığım nəticə budur ki, Quran tilavəti cəmiyyətdə ciddi və geniş yayılmış bir mövzuya çevrilməlidir".
O əlavə etdi: "Onun baxışına görə, insanlar o qədər Quran dinləməli və onunla ünsiyyətdə olmalıdırlar ki, həyatın hər anında, düşdükləri vəziyyətə uyğun olaraq, bir Quran ayəsi onların köməyinə çatsın; sanki Quran insanın yanında həmişəlik bir dost və daimi bir yoldaşdır ki, ona doğru yolu göstərir".
Peyğəmbərimizin (s) vəhydən və Qurandan başqa bir şey söyləmədiyini ifadə edən Əbülqasimi vurğuladı: "Əgər insan belə bir yoldaşı öz zehnində və canında daşıyarsa, hər bir vəziyyətdə Allahın həmin şəraitdə ona nə əmr etdiyini və necə davranmalı olduğunu düşünə bilər".
O, sözlərinə belə davam etdi: "Bu hədəfin reallaşması üçün Quran ayələrinin insanların zehnində möhkəmlənməsi lazımdır. Quranın sadəcə mobil telefonda olması və ya gündəlik tilavəti, anlayışların zehnə ötürülməsi üçün bir müqəddimədir; lakin ayələr insanın zehnində yer etdikdə, o, müxtəlif vəziyyətlərdə onlardan bəhrələnə bilər. Əks təqdirdə, insan öz şəxsi rəyi və zövqü əsasında qərar vermək məcburiyyətində qalacaq".
Beynəlxalq qari vurğuladı: "Şəhid rəhbər inanırdı ki, Quran tilavəti kürsüləri o qədər genişlənməlidir ki, insanlar öz həyat problemlərini və məsələlərini Qurana müraciət edərək həll edə bilsinlər. Hətta arzuolunan üfüq budur ki, insanlar Quran ayələri ilə bir-biriləri ilə danışa bilsinlər".
O, Quran hafizlərindən nümunələr gətirərək dedi: "Mərhum Məhəmmədhüseyn Təbatəbai kimi şəxslər elə bir mərhələyə çatmışdılar ki, hər bir suala Quran ayələri ilə cavab verirdilər. Bu, şəhid rəhbərin cızdığı həmin üfüqdür; ilahi ayələrin təkrar, dinləmə və davamlı ünsiyyət nəticəsində insanların zehnində və canında qaldığı bir üfüq".
Əbülqasimi çıxışının digər hissəsində şəhid rəhbərin vida mərasiminin ab-havasına toxunaraq dedi: "Xarici heyətlərin də iştirak etdiyi mərasimdə şəhid rəhbərlə yaxından vidalaşmaq şərəfinə nail oldum".
O, mərasimdə iştirak edən insanların vəziyyəti haqqında əlavə etdi: "Əgər insanların hisslərini bir sözlə təsvir etməli olsam, deyərdim ki, onlar 'aşiqanə' gəlmişdilər. Havanın istiliyinə, uzun piyada yoluna və mərasimdəki çətinliklərə baxmayaraq, insanların simasında eşq və hörmətdən başqa bir şey görünmürdü. Onlar bütün varlıqları, səmimi qəlbləri və xalis niyyətləri ilə şəhid rəhbərlə vidalaşmağa gəlmişdilər və bu eşq bütün iştirakçıların simasında tamamilə aşkar idi".
4362258
