Məkkə muzeyində Quranın ilkin yazılma vasitələrinin nümayişi
“İQNA”-nın "Əl-Ərəbiyyə"yə istinadən verdiyi məlumata görə, kağızın yaranmasından və Quranın bir cilddə toplanmasından əvvəl vəhy katipləri ayələri dəri, xurma ağacı budaqları, daşlar və heyvan sümükləri üzərində toplayırdılar. Bu dövr, vəhyin enişini sənədləşdirən və ayələri ilk andan etibarən qoruyan ən vacib tarixi dövrlərdən biri idi.
Məkkədəki Hira mədəniyyət zonasında yerləşən Quran muzeyi, vəhy katiplərinin istifadə etdiyi və Quranın necə toplandığını əks etdirən vasitələrin nümunələrini nümayiş etdirməklə, bu mühüm dövrü maraqlananlar üçün canlandırıb.
Muzey tarixi rəvayətlərə əsaslanaraq, ziyarətçilərə müqəddəs Quranın yazılmasının ilk mərhələləri haqqında canlı vizual mənzərə təqdim edir.
Məkkə muzeyi həmçinin, Quran bir cilddə toplanmazdan əvvəl ən çox istifadə olunan materiallar olan aşılanmış dəri, xurma budaqları, taxta parçaları, daşlar və xüsusilə də heyvanların kürək və qabırğa sümükləri kimi vəhy ayələrinin yazıldığı vasitələri nümayiş etdirir.
Dəri, mətnlərin qorunmasındakı davamlılığına və müqavimətinə görə ən geniş istifadə olunan material kimi qiymətləndirilir. Bu vasitə aşılanaraq yazmaq üçün yararlı hala gətirilmiş heyvan dərilərindən hazırlanırdı və bu da onu Peyğəmbər dövründə Qurani-Kərimin ayələrini qorumaq üçün ən vacib vasitələrdən birinə çevirmişdi.
Sərgi vəhyin nazil olduğu mühit və ilk müsəlmanların İslamın əvvəlində Allahın kitabını qorumaq üçün istifadə etdikləri üsullar haqqında ziyarətçilərə dolğun bir təsəvvür yaradır.
Qurani-Kərim muzeyi öz ziyarətçilərini Qurani-Kərimin tarixi, onun elmləri, yazılma mərhələləri, tərtibi və müqəddəs kitabın müxtəlif dövrlər ərzindəki təkamülünü izah edən intellektual bir səyahətə çıxarır. Bu, elmi sənədləri vizual təcrübə ilə birləşdirən müasir sərgi zalları və interaktiv texnologiyalar vasitəsilə həyata keçirilir.
Bu muzey, Məkkə ilə bağlı İslam irsini ön plana çıxarmaq və Quranın nazil olması ilə əlaqəli tarixi hadisələri ziyarətçilərə tanıtmaq məqsədi daşıyan Hira mədəniyyət zonasının bir hissəsidir.
4364246
