Misirli futbol ulduzuna Quran hədiyyəsi
“İQNA”, "Əl-Bəvvabə News"-a istinadən xəbər verir ki, Daqəliyyə qubernatoru general-mayor Tariq Mərzur, Misir milli komandasının və "Əl-Əhli" klubunun ulduzu İmam Aşuru təltif etmək məqsədilə ona əyalətin fəxri lövhəsi ilə yanaşı, "Qurani-Kərim"in bir nüsxəsini hədiyyə edib.
Vali Quranın ilk səhifəsində İmam Aşurun və onun komanda yoldaşlarının 2026-cı il Dünya Çempionatındakı uğurlarına görə minnətdarlıq hissi ilə dolu, ata qayğısı və səmimi dualarla yazılmış bir mesaj qeyd edib.
Bu hadisə qubernatorun futbolçunu və onun ailəsini öz ofisində qəbul etdiyi zaman baş verib. Mərasim İmam Aşurun Dünya Çempionatı boyunca milli komanda ilə göstərdiyi və misirli azarkeşlərə sevinc bəxş edən yüksək performansı münasibətilə keçirilib.
General-mayor Tariq Mərzur hədiyyənin üzərində bunları yazıb: "Mərhəmətli və Rəhimli Allahın adı ilə! Bu mübarək Quran nüsxəsini əziz oğlum, Misir milli komandasının qəhrəmanlarından biri və Daqəliyyə əyalətinin, xüsusilə Sünbəllavəyn şəhərinin yetirməsi olan İmam Aşura təqdim edirəm. Bu hədiyyə onun və digər qəhrəmanların 2026-cı il Dünya Çempionatında əldə etdikləri misilsiz uğurun şərəfinə verilir. Dua edirəm ki, o, bu müqəddəs kitabın qoruyucusu və Misir xalqının qürur və sevinc mənbəyi olaraq qalsın".
O, əsl uğurun həmişə əxlaqi, dini və milli dəyərlərə sadiqliklə bağlı olduğunu vurğulayıb.
Görüş zamanı qubernator İmam Aşura ruhlandırıcı sözlər deyib və ondan təvazökar qalmağı, doğulduğu Sünbəllavəyn şəhərini heç vaxt unutmamağı istəyib.
Tariq Mərzur bildirib: "Daqəliyyə xalqı Misirin mövqeyini yüksəldən uğurlara imza atan hər kəslə fəxr edir".
General-mayor Tariq Mərzur vurğulayıb ki, uğurlu şəxsiyyətlərin təltif edilməsi əyalətin müxtəlif sahələrdə uğur qazanmış insanlara dəstək vermək öhdəliyini nümayiş etdirir. Bu insanlar yeni nəsillər üçün əsl nümunə kimi çıxış edir və fədakarlığın, zəhmətkeşliyin uğura aparan yol olduğunu təcəssüm etdirirlər.
Valinin əllə yazdığı mesaj sosial mediada böyük marağa səbəb olub. Bir çox istifadəçi Daqəliyyənin ən parlaq övladlarından birinə çevrilən və adını Misir futbol tarixinə yazdıran futbolçuya ünvanlanan səmimi, ata duyğuları və iman dolu mesajı yüksək qiymətləndirib.
İmam Aşur Dünya Çempionatında Misirin təsirli oyunçularından biri olub və Belçika ilə Avstraliyaya qarşı keçirilən oyunlarda iki vacib qol vurmağı bacarıb. 28 yaşlı futbolçunun performansı Avropa və Amerika qitələrindən olan klubların onun vəziyyətini yaxından izləməsinə səbəb olub. Misirin "Əl-Əhli" klubu rəhbərliyi Aşurun müqaviləsinin uzadılması üçün yeni təklif hazırlamağı planlaşdırır. Bu yarımmüdafiəçinin hazırkı müqaviləsi 2028-ci ilin yayına qədər qüvvədədir, lakin "Əl-Əhli" maaşı artırmaq və müqaviləni vaxtından əvvəl uzatmaqla onun ayrılmasının qarşısını almaq istəyir.
4364621
