"İQNA"-nın "vanguardngr" saytına istinadən verdiyi məlumata görə, silahlı şəxslər Nigeriyanın Burqu bölgəsindəki bir neçə kəndə hücum edərək, cümə namazından sonra naməlum sayda namaz qılanı qaçırıblar.

Yerli rəsmilər bu hücumların bir neçə kənd icmasında baş verdiyini və bu sərhəd bölgəsindəki təhlükəsizlik vəziyyəti ilə bağlı narahatlıqları artırdığını bildiriblər.

Bölgənin federal nümayəndəsi Cəfər Məhəmməd Şətiman Burqunun sözlərinə görə, hücumlar Dakara, Qidan Zana, Sabon Qida və Masaka kəndlərində həyata keçirilib.

O, BBC-yə bildirib ki, qaçırılanların dəqiq sayı hələlik məlum deyil.

Şətiman Burqu deyib ki, hücum edənlər cümə namazından sonra Dakara kəndinə daxil olaraq məscidi mühasirəyə alıb və namaz qılanları meşəyə aparıblar.

Onun sözlərinə görə, silahlılar daha sonra qonşu kəndlərə gedərək daha çox insanı qaçırıblar.

O əlavə edib ki, bəzi namaz qılanlar soyuq silahla hücuma məruz qalıblar və xəsarət alsalar da, onlardan bir qismi qaça bilib.

Federal nümayəndə bildirib ki, bölgədəki meşələr "Lakurava" və "Mamudava" qruplaşmalarının üzvü olduqları şübhə edilən şəxslər üçün sığınacağa çevrilib. Cümə günü baş verən hücumlardan sonra bu iki qruplaşma arasında fikir ayrılığı yaranıb; onun sözlərinə görə, bu fikir ayrılığı bəzi üzvlərin məscidlərə basqın edilməsinə və namaz qılanların qaçırılmasına qarşı çıxması ilə bağlı olub.

Rəsmilər qaçıranların gəncləri üzv kimi cəlb etməyi hədəflədiklərini ehtimal edirlər, baxmayaraq ki, hücum edənlərin hansı qrupa mənsub olduğu hələ də bəlli deyil.

Son aylarda Nigeriyanın bəzi bölgələrində "Lakurava"ya mənsub olduqları şübhə edilən yaraqlıların fəaliyyəti barədə hesabatlar yayılıb.

Təhlükəsizlik qurumlarının silahlı qruplara qarşı əməliyyatların davam etdiyini vurğulamasına baxmayaraq, bu yeni hücumlar Burqu bölgəsindəki ciddi təhlükəsizlik çağırışlarını bir daha ön plana çıxarıb. Ötən həftə də bu bölgənin bəzi yerlərində 20-dən çox insan öldürülüb.

Burqu 2025-ci ilin noyabrında da kütləvi adam oğurluğunun şahidi olmuşdu. Həmin hücumda silahlı şəxslər 200-dən çox şagirdi qaçırmışdı və uşaqlar təxminən bir aylıq əsirlikdən sonra azad edilmişdilər.

4371230