“İQNA”-nın "Masrawy"a istinadən verdiyi məlumata görə, Əhməd Muslamaninin rəhbərlik etdiyi Misir Milli Media Təşkilatı, Misir Quran Radiosunda "Böyük İmam" adlı yeni proqramın başladığını bildirib. Bu proqram təqribən 90 il ərzində Əl-Əzhər şeyxləri və imamları tərəfindən edilmiş çıxış və xütbələri əhatə edəcək.

Proqram Əl-Əzhərin şeyxi Məhəmməd Mustafa əl-Mərağidən tutmuş indiki şeyx Əhməd əl-Tayyibə qədər olan dövrü əhatə edəcək.

Misir Radiosunun rəhbəri Əbdülrəhman Bəsyuni bildirib ki, proqram XX və XXI əsrlərdə bu vəzifəni tutmuş Əl-Əzhər şeyxlərinin çıxışlarına diqqət yetirəcək

Digər tərəfdən, Misir Quran Radiosu şəbəkəsinin rəhbəri İsmayıl Dəvidar qeyd edib ki, bu stansiya radiostansiyanın rəsmi fəaliyyətindən əvvəl və sonra lentə alınmış görkəmli şeyxlərin çıxışlarından ibarət geniş bir arxivə malikdir.

O, əlavə edib ki, stansiya İslam irsini toplayanlarla və nadir səs yazıları olan şəxslərlə əlaqə saxlayıb. Məqsəd, əgər varsa, xüsusi yayım dövrlərinə aid olan səs yazılarını əldə edərək proqrama daxil etməkdir.

Radio arxivi Əl-Əzhərin görkəmli imamlarının təxminən 600 səsli çıxışını ehtiva edir. Bu çıxışlara aşağıdakılar daxildir: Əl-Əzhərin şeyxi Əhməd əl-Tayyibdən 180, Şeyx Cadülhaqq Əli Cadülhaqqdan 99, Şeyx Məhəmməd Seyid Təntavidən 92, Şeyx Mahmud Şəltutdan 90, Şeyx Əbdülhəlim Mahmudan 64, Şeyx Həsən Məmundan 38, Şeyx Əbdülrəhman əl-Bisardan 20 və 92 ildən çox əvvəl, radionun özəl yayımı dövründə lentə alınmış Şeyx Məhəmməd Mustafa əl-Mərağidən 2 çıxış.

4369976