د ايران د قرانی خبری اژانس ايكنا د يو راپور پر اساس، چې د حج له ويب پاڼې یې نقلوی د حج د دستورو په مناسبت د رهبرۍ د سترمقام پيغام متن چې په حج كې د رهبر استازې ښاغلی عسګر پور ولوست لاندې دی
بسم الله الرحمن الرحيم
والحمدلله رب العالمين و صلی الله علی سيدنا محمد المصطفی و آله الطيبين و صحبه المنتجبين
كعبه چې د وحدت او عزت راز او د توحيد او معنويت بيلګه ده.
د حج په ورځو كې د هغو ليواله او هيله منو زړونو كوربا ده چې له درستې نړۍ یې د خپل عزتمن پالوونكی غږ ته ځواب ويلی او د لبيك په نعرو سره د اسلام زیږنځای ته زغاستلې دی. دا دی اسلامی امت اوس د خپلې پراختيا او تنوع او د هغې ايمانی ژورتيا چې د دغه حنيف دين د لارويانو په زړونو واكمنه ده، كوټلی انځور، د خپلو استازو په سترګو چې د نړۍ له ګوټ ګوټه دلته راغونډ شوې دی ليدلی شی او دغه لويه او بې سارې پانګه ښه پيژندلی شی.
دا د ځان بيا پيژندنه، له مونږ سره مرسته كوی چې مونږ مسلمانان په نننۍ او سبانۍ نړۍ كې په خپل غوره موقعيت پوه شو او د هغه په لور وخوځیږو.
په نننۍ نړۍ كې د اسلامی ویښتيا د څپې پراختيا هغه حقيقت دی چې اسلامی امت ته د ښې سبا زيری وركوی. له تيرو ديرشو كلونو چې د اسلامی انقلاب په برياليتوب او د اسلامی جمهوريت د نظام په جوړيدو سره دا ځواكمن غورځنګ پيل شوی دی، زمونږ اسلامی امت پرله پسې پر مخ تللی، ځينې خنډونه یې له لارې غړولې او ځينې مورچې او سنګرې یې فتح كړې دی.
د استكبار د دښمنۍ د رودو لا پيچلې كيدل او هغه زيات لګښته هڅې چې د اسلام په مقابله كې یې كوی د هم دغه پرمختګونو له امله دی.
له اسلامه د ويرولو لپاره د دښمن پراخې پروپیګنډې، هغه وارخطا هڅې چې د اسلامی فرقو په مينځ كې د اختلاف د اچولو او د فرقه ايزو تعصبونو د پورته كولو لپاره یې كوی، د سنيانو لپاره له شيعيانو او د شيعيانو لپاره له سنيانو د دورغو او جعلی دښمنانو جوړول، د مسلمانو د ولتونو په مينځ كې تفرقه اچول، د اختلافونو د زياتولو او په تربګنيو او ناحله شخړو د هغو د بدلولو هڅې، په ځوانانو كې د فساد او فحشاء د پيدا كولو لپاره له استخباراتی او جاسوسی موسسو استفاده، دا ټول او ټول د عزت، پت او ویښتيا په لور د اسلامی امت د كلكو او مزبوتو ګامونو او حركت په وړاندې وارخطا او پريشانه غبرګونونه دی.
د تيرو ديرشو كلونو په اپوټه، نن صهيونسټ رژيم يوه نه ماتيدونكې بلا نه ده پاتې شوې؛ او د تيرو شلو كلونو په اپوټه اوس امريكا او لويدیځ په مينځنی ختیځ كې خپل سره او ازاد تصميم نيونكی نه دی پاتې،
د تيرو لسو كلونو په خلاف نن دا دی ایټمی ټيكنالوجی او نورې پيچلې ټيكنالوجۍ د سيمې د هيوادونو له لاسرسۍ ليرې او يوه افسانه نه ګڼل كیږی.
نن د فلسطين ولس د مقاومت اتل دی، د لبنان ولس په يوازې سر د صهيونسټ رژيم د جعلی هيبت او بوت ماتوونكی او د درې ديرش ورځنی جنګ ګټونكی دی. او د ايران ولس د ترقۍ د څوكو په لور د حركت بيرغوال او مخكښې دی.
نن دا ده غاوره امريكا، چې د اسلامی سيمو ځان بولې كوماندانه او د صهيونسټ رژيم اصلی ملاتړې ده په هغه جبهې كې چې ځانته یې په افغانستان كې جوړه كړې ښكيله شوې ده؛
په عراق كې سره له هغو ټولو جرمونو چې د دغه هيواد په خلكو یې تپلې دی د ځانله كيدو په حال كې ده او په مصيبت ځپلې پاكستان كې تر هميشه كركجنه ده.
نن د اسلام مخالفه جبهه چې دوه پیړۍ یې پر اسلامی ولسونو او دولتونو ظالمانه امر چلاوه او د هغوی سرچينې یې شوكولې، د خپل نفوذ د ځوړتيا او د ځان په وړاندې د مسلمانو ولسونو د زړه ورې دريدا كتونكې ده.
او د دې په مقابل كې، د اسلامی بيدارۍ قافله د پرمختګ او ډيرنده ژورتيا په لور روانه ده.
دا هيله منوونكی او زيرې راوړونكی حالت بايد مونږ مسلمان ولسونه له يوه پلوه تر هر وخته ډاډمن د ښه راتلونكی په لور وخوځوی، او له بل پلوه مو په خپلو عبرتونو او درسونو سره تر هميشه بيدار او هوښيار وساتی.
دا عمومی خطاب بې له شكه، دينی عالمان، سياسی مشران روڼ اندی او ځوانان تر نورو زيات ژمنوی او له هغوی زيار او مخكې تګ غواړی.
قران كريم په جار او ژوندی مونږ ته وايی «كُنتُمْ خَیْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللَّـهِ))
اسلامی امت په دغه خطاب كې عزتمن او د ټول بشريت لپاره پاڅيدلی امت معرفی شوی او د دغه امت د پنځولو هدف د انسانانو خير او ژغورنه ده.
او د دغه امت لويه دنده نيكيو ته بلل ، له بديو غړول او پر خدای پاك كلك ايمان دی. د استكبار د شيطانی قدرت له منګولو د ولسونو تر ژغورلو بل لوی معروف او نيكی نيشته او د مستكبرانو تر خدمت او ورپورې تر پيليتيا بل زښت منكر نيشته.
نن د فلسطين له ولس او د غزې له كلابندو شويو سره مرسته، د افغانستان، پاكستان، عراق او كشمير له ولسونو سره ملګرتيا د امريكا او صهيونسټ رژيم د تيری په وړاندې مجاهدت او مقاومت، د مسلمانانو د يووالی ساتنه او له ككړو لاسونو او تالی څټو ژبو سره چې دغه اتحاد ته تاوان رسوی مبارزه او په ټولو اسلامی پرګنو كې په مسلمانو زلميانو كې د بيدارۍ، او د ژمنتوب او مسووليت د احساس پراختيا هغه لویې دندې دی چې د امت خواص یې لری.
د حج پرتمينه ننداره ددغه دندو د ترسره كولو لپاره برابره زمينه مونږ ته راښيی او مونږ دوه چنده هڅې او زيار ته رابولی.
والسلام عليكم و رحمة الله سيد علی حسينی خامنه ای
د ۱۴۳۱ هجری سپوږميز كال د ذی الحجې د مياشتې لومړۍ
او د ۱۳۸۹ هجری لمريز كال د لړم دمياشتې اولسمه نیټه
695935
