یکنانیوز راپور راکوي، ټولنپوه او دیني کارپوه، حجت‌الاسلام علیرضا قبادي، په یوې لړۍ کې د رسول اکرم(ص) د ژوند هغو هېر شویو او له پامه غورځول شویو اړخونو ته په نوې او عملي کتنې سره بیاکتنه کوي.

رسول الله(ص) د خپل مبارک عمر په وروستیو ۱۴ ورځو کې ناروغ و. د ناروغۍ په یوه ورځ  د حضرت علي(ع) او فضل بن عباس په مرسته جومات ته ولاړ او خلکو ته ئې په خبرو کې د خپل مرګ خبر ورکړ. ویې فرمایل: «که ما له چا سره کومه ژمنه کړې وي، هغه دې ووایي، څو یې پوره کړم؛ او که پر ما د چا کوم حق وي، هغه دې هم ووایي، څو ئې ادا کړم.»

د وفات درې ورځې وړاندې، سره له دې چې ناروغي یې ډېره سخته شوې وه، بیا جومات ته ولاړ او خلکو ته یې وفرمایل: «که پر ما د چا کوم حق وي، پورته دې شي او څرګند دې یې کړي؛ ځکه په دې نړۍ کې قصاص اخیستل د قیامت د ورځې له قصاص څخه اسانه دي.

په دې وخت کې «سواده» نومی کس پورته شو او ویې ویل: کله چې له طائف څخه د بېرته راستنېدو پر مهال تاسو غوښتل خپله سپرلۍ حیوان  په دُرې ووهئ، هغه دُره زما پر بدن  ولګېده. اوس غواړم د هغه ګوزار قصاص واخلم.

رسول الله(ص) امر وکړ چې هماغه دُره دې له کوره راوړل شي، څو قصاص ترسره شي. بیا ئې خپل قمیس پورته کړ او ځان ئې د قصاص لپاره چمتو کړ.

کله چې «سواده» د رسول الله(ص) مبارک بدن ولید، ور وړاندې شو، د رسول الله(ص) بدن ئې ښکل کړ. په دې وخت کې رسول الله(ص) د سواده لپاره دعا وکړه او ویې فرمایل: «خدایه! لکه څنګه چې هغه ستا له پیغمبر څخه تېر شو، ته هم ترې تېر شه.

کله چې رسول الله(ص) له دومره لوړ مقام سره، سره له دې چې د جنت ځېری ورکړل شوی و، بیا هم د خلکو ـ که څه هم غیرمسلمان وي ـ د حقونو د جبران هڅه کوي، نو نور خلک د خلکو د حقونو د نه ادا کولو په اړه د خدای تعالی په وړاندې څه عذر وړاندې کولی شي؟

څنګه کېدای شي یو څوک د رسول الله(ص) د پیروۍ ادعا وکړي، خو په عین حال کې د خلکو کوم حق پرې پاتې وي او له هغوی څخه یې حلالیت نه وي اخیستی؟

داسې ښکاري چې رسول الله(ص) د خلکو، حتی د غیر مسلمانو، د حقوقو په ادا کولو او له هغوی څخه د حلالیت په غوښتلو سره، هغو کسانو ته چې د خلکو د حقونو په ادا کولو کې لټی کوي، د هر ډول عذر او توجیه لار تړلې ده او په خپل دغه عمل سره یې پر ټولو حجت تمام کړی دی.

https://iqna.ir/fa/news/4369761