د ایکنا د راپور له مخې، د مصر د ملي رسنیو ادارې ، چې مشري ئې احمد مسلماني کوي، د مصر د قرآن راډیو پر څپو د «امام اعظم» په نوم د یوې نوې خپرونې د پیل خبر ورکړی دی. په دې خپرونه کې به هغه ویناوې او خطبې شاملې وي چې د الازهر شیخانو او امامانو د  کابو ۹۰ کلونو په اوږدو کې وړاندې کړې دي.

دا خپرونه به د الازهر د مشرتابه پړاؤ  له شیخ محمد مصطفی المراغي څخه رانیولې د الازهر تر اوسني شیخ، احمد الطیب، پورې ټولو  ته پوښښ ورکړي.

د مصر د راډیو مشر عبدالرحمن بسیوني،   په دې اړه وویل چې دغه خپرونه به د الازهر د هغو شیخانو پر ویناوو تمرکز وکړي چې د شلمې او یوویشتمې پېړۍ په اوږدو کې ئې د الازهر د مشرتابه مقام ترسره کړی دی.

له بلې خوا،د مصر د قرآن راډیو  چینل مشر اسماعیل دویدار، وویل چې دغه راډیو د دغو نامتو شیخانو له ویناوو څخه پراخ ارشیف لري؛ هغه ویناوې چې د راډیو له رسمي تأسیس څخه مخکې او وروسته ثبت شوې دي.

هغه زیاته کړه: راډیو له هغو کسانو سره هم اړیکه نیولې چې د اسلامي میراث او نادرو ثبتونو د ټولولو په برخې کې فعالیت کوي، څو معلومه کړي چې آیا دوي د راډیو د خصوصي خپرونو له دورې څخه کوم ثبت شوي مواد لري که نه،څو د امکان په  بڼه کې دغه مواد هم په خپرونې کې شامل شي.

د راډیو په ارشیف کې د الازهر د نامتو امامانو کابو  ۶۰۰ ثبت شوې ویناوې موجودې دي. په دغو ویناوو کې د الازهر د شیخ احمد الطیب ۱۸۰ ویناوې، د شیخ جاد الحق علي جاد الحق ۹۹ ویناوې، د شیخ محمد سید طنطاوي ۹۲ ویناوې، د شیخ محمود شلتوت ۹۰ ویناوې، د شیخ عبدالحلیم محمود ۶۴ ویناوې، د شیخ حسن مأمون ۳۸ ویناوې، د شیخ عبدالرحمن البیصار ۲۰ ویناوې او د شیخ محمد مصطفی المراغي دوه ویناوې شاملې دي. د المراغي دغه دوه ویناوې څه باندې ۹۲ کاله وړاندې د راډیو د خصوصي خپرونو په پړاؤ  کې ثبت شوې دي.

https://iqna.ir/fa/news/4369976