ایکنا نیوز د «الکومبس» په حواله راپور راکړ، د ستاکهم د جامع جومات امام او مدیر محمود الخلفي د دې خبر په اعلانولو سره وویل چې د جمعې په سهار، د زمري په ۲۳مه، د جومات په بهرني انګڼ کې یو ځل بیا د قرآن کریم د یوې نسخې سپکاوی شوی دی. د نوموړي په وینا، دا له ۲۰۲۵ کال د ډسمبر راهیسې د ورته پېښو درېیمه قضیه ده.

الخلفي په فېسبوک کې له خپل خپاره کړي پوسټ سره یو عکس هم شریک کړی و چې په کې د قرآن کریم یوه نسخه ښکاره کېده. د قرآن کریم پر پوښ باندې سوري شوي وو او دغه نسخه په زنځیر او قلف سره د جومات له دباندې یوې کټارې ته ځړول شوې وه.

د جومات امام وائي  د اسلام ضد بریدونه تکرارېږي

الخلفي وویل چې دغه پېښه د ورځې کابو  ۱۱ بجې رامنځته شوې ده. هغه زیاته کړه چې دا پېښه د جومات مخې ته د قرآن کریم پر وړاندې د پرله‌پسې بریدونو د لړۍ یوه برخه ده.

هغه وویل، د ده په اند، دغه پېښې داسې پیغامونه لري چې موخه ئې د قرآن کریم سپکاوی، د مسلمانانو وېرول او د هغوی پر وړاندې د کرکې خپرول دي.

نوموړي ټینګار وکړ چې دا پېښې نورې جلا او تصادفي پېښې نه دي، بلکې په سویډن کې د مسلمانانو پر وړاندې د هغه څه له زیاتېدو سره هم‌مهاله رامنځته کېږي چې ده یې «توکمپاله او پاروونکې څرګندونې» بللې دي.

الخلفي له سویډني چارواکو او ټولنې وغوښتل چې د دغو بریدونو په وړاندې روښانه دریځ غوره کړي. هغه ټینګار وکړ چې له دغو کړنو سره مبارزه یوازې د مسلمانانو دفاع نه ده، بلکې د سوله‌ییز ګډ ژوند، متقابل درناوي، د توکمپالنې، پارونې او مذهبي کرکې د ردولو لپاره هم اړینه ده.

تر اوسه پورې سویډني پولیسو د دې پېښې د جزئیاتو یا د عامل د هویت په اړه کوم رسمي معلومات نه دي خپاره کړي.

نړیوال څارونکي باور لري چې په سویډن کې افراطي زوړ پال  او ښي پال  ګوندونه د مسلمانانو د سپکاوي پر  اساس  د یوه منظم بهیر په رامنځته کولو سره، د قرآن کریم د سپکاوي او سوځولو په څېر اقدامات کاروي، څو د دغه هېواد موجودې ستونزې د مسلمانانو له شتون سره وتړي، په پایله کې سویډن ته د مسلمانانو د کډوالۍ کچه کمه او له دغه هېواده د مسلمانانو د ویستلو  زمینه برابره کړي.

https://iqna.ir/fa/news/4369859