د ولسي مدیریت او حسیني مینې یوځای کېدل ددغې حماسې یوه غوره نتیجه ده

ایکنا- د ایران د اسلامی جمهوریت د قرآن او عترت د مؤسسو او تنظیمونو  د اتحادئې د مدیره پلاوي مرستیالې سیده مریم موسوي‌زاده د خوزستان ولایت د قرآني موکبونو د پروګرامونو په تشریح کې وویل، د ولسي مؤسسو ګډون او منظم پلان جوړونه داسې خدمتونه برابر کړي چې نه یوازې د زائرانو مادي اړتیاوې پوره کوي، بلکې د هغوی  کلتوري او معنوي اړتیاوو ته هم ځواب وایي.

د امام حسین(ع) د اربعین ستر او میلیوني پلی لاریون ، چې د اسلامي نړۍ تر ټولو لوی ولسي ټولېدنه ګڼل کېږي، هر کال د همدردۍ، ایثار او د حضرت اباعبدالله الحسین(ع) زائرانو ته د مخلصو خدمتونو ښکلی انځور وړاندې کوي.

په دې لړ کې، د خوزستان ولایت د عراق پر لور د زائرانو د واریدیدا له مهمو دروازو څخه دی او د اهل‌بیت(ع) د میلیونونو مینه‌والو په کوربتوب کې مهم رول لري.

د رفاهي خدمتونو ترڅنګ، قرآني موکبونه هم د ولسي قرآني مؤسسو په مرسته هڅه کوي چې د اربعین لاره د قرآن کریم د فرهنګ او د اهل‌بیت(ع) د معارفو د خپرولو په یوه مناسب فرصت بدله کړي.

سیده مریم موسوي‌زاده، چې د ایران  د قرآن او عترت د مؤسسو او تنظیمونو د اتحادئې د مدیره پلاوي مرستیاله او د خوزستان د قرآن او عترت د مؤسسو د اتحادئې اجرائي مشره ده، له ایکنا سره په مرکه کې د دې ولایت د قرآني موکبونو د پروګرامونو، تګلارو او راتلونکو لیدلورو په اړه څرګندونې وکړې.

هغې وویل، حسینی اربعین یوازې د خلکو یوه ستره  ټولېدنه نه ده، بلکې د قرآن کریم د فرهنګ او د اهل‌بیت(ع) د معارفو د پراختیا لپاره یو بې‌ساری فرصت هم دی. له همدې امله هڅه شوې چې د رفاهي خدمتونو ترڅنګ، فرهنګي او قرآني خدمتونو ته هم ځانګړی ځای ورکړل شي.

هغې زیاته کړه، سږ کال د لا دقیق پروګرام  او منظم مدیریت په برکت، د قرآني موکبونو فعالیتونه تر پخوا ډېر هدفمند شوي دي، څو زائران د عمومي خدمتونو ترڅنګ له قرآني او معنوي فضا څخه هم برخمن شي.

موسوي‌زاده د شلمچې سرحد ځانګړي اهمیت ته په اشارې وویل، شلمچه د ډېرو حسیني زائرانو لپاره لومړنی تمځای دی چې د عراق سپېڅلو زیارتونو ته روانېږي؛ له همدې امله اړینه ده چې دا معنوي سفر د قرآن کریم له عطرو او رڼا او  نور سره پیل شي.

هغې د خرمشهر د «نورالهادي» قرآني موکب د دې تګلارې یوه بریالۍ بېلګه وبلله.

موسوي‌زاده وویل، هغه څه چې اوس د اربعین د پیاده‌روۍ په لاره، په ځانګړي ډول د شلمچې په پوله کې لیدل کېږي، یوازې زائرانو ته عادي خدمتونه نه دي، بلکې د هوښیار مدیریت، ولسي مشارکت او قرآني فعالیتونو یو بریالی ماډل دی. دا ماډل ښئي چې هرکله علمي مدیریت، فرهنګي لیدلوری او د قرآن کریم ښوونې سره یوځای شي، نو زائرانو ته خدمت کول یوازې یوه اجرایي دنده نه پاتې کېږي، بلکې په یوه تلپاتې عبادت او اغېزشیندونکي کلتوري خدمت بدلېږي.

https://iqna.ir/fa/news/4367301