مصر: مختلف شہروں میں دھماکے، متعدد ہلاک و زخمی
ایکنا نیوز- ایران ریڈیو- مصر کے شمالی شہر اسکندریہ میں کرافر مارکیٹ کے قریب ایک دھماکے میں ایک راہ گیر ہلاک اور چھے دیگر زخمی ہوگئے۔ دوسری جانب دارالحکومت قاہرہ کے مشرق میں نصر شہرمیں بجلی کے محکمہ کےقریب ہونےوالے بم دھماکے میں متعدد افراد زخمی ہوگئے جبکہ دھماکے کے نتیجے میں وہاں آگ بھی لگ گئی۔ مصری پولیس زرائع نے دھماکے کی تصدیق کردی ہے۔ اس سے پہلے المحلہ الکبری میں بھی ایک بم دھماکےمیں دو پولیس اہلکار ہلاک اور کئی دیگرزخمی ہوگئے تھے۔ واضح رہے کہ مصر میں سیکورٹی اہلکاروں کے خلاف حملے معمول بن گئے ہیں۔ ان حملوں کی ذمہ داری انتہاپسند گروہ قبول کرتے ہیں۔ کہا جاتا ہے کہ انتہا پسند عناصر یہ اقدامات اس ملک کے معزول صدر محمد مرسی کے حامیوں کو حکومت کے ذریعے بدترین سزائیں دیئے جانے کے ردعمل میں کرتے ہیں۔ مصری سیکورٹی ذرائع کا کہنا ہےکہ اسکندریہ چیک پوسٹ کے نزدیک، ایک اور بم دھماکے میں تین راہگیر معمولی طور پر زخمی ہوگئے۔ مصری حکومت کے اعلان کے مطابق مرسی کی برطرفی کے وقت سے سینکڑوں فوجی اور پولیس اہلکار، انتہا پسندوں کے حملوں میں مارے گئے ہیں۔ جبکہ سیکورٹی فورسز نے بھی مرسی کی حمایت میں مظاہرے کرنے والے چودہ سو سے زائد افراد کو ہلاک اور پندرہ ہزار افراد کو جیل میں ڈال دیا ہے۔
