ایک کمزور ملت اپنے زمانے کے امام کی ناصر نہیں ہوسکتی، ناصر عباس شیرازی
ایکنا نیوز- اسلام ٹائمز۔ مجلس وحدت مسلمین پاکستان شعبہ قم کے زیر اہتمام مدرسہ حجتیہ کے مطہری ہال میں قبلہ مفتی جعفر حسینؒ کی برسی کا پروگرام منعقد کیا گیا۔ پروگرام سے خطاب کرتے ہوئے ایم ڈبلیو ایم پاکستان کے مرکزی سیکرٹری سیاسیات سید ناصر عباس شیرازی نے کہا کہ مجلس وحدت آج جتنے کام بھی کر رہی ہے، ان کی بنیادیں سید محمد دہلویؒ، مفتی جعفر حسینؒ اور علامہ عارف حسین الحسینیؒ نے ہی ڈالی ہیں۔ انہوں نے کہا کہ امام خمینیؒ نے بھی قائد شہید کے افکار کو زندہ رکھنے کا حکم دیا ہے اور الحمدللہ ایم ڈبلیو ایم نے اس حکم پر لبّیک کہتے ہوئے آج مختلف محاذوں پر پاکستان میں استعمار اور تکفیریت کو زبردست شکست دی ہے۔ سیکرٹری سیاسیات نے اپنے خطاب میں کہا کہ پاکستان میں اہل تشیع کو اچھوت بنا دیا گیا تھا، ہمارے سرکاری ادارے اور سیاستدان اہل تشیع کی ٹارگٹ کلنگ کی سرپرستی کرتے تھے، حکومتی سرپرستی میں طالبان، کالعدم سپاہ صحابہ اور لشکرِ جھنگوی جیسی شیعہ کش تنظیمیں سرِعام سرگرم تھیں، لیکن ایم ڈبلیو ایم کی میدانِ عمل میں جہد مسلسل اور جرات و استقلال کے باعث بہت ہی کم عرصے میں آج سب کو شیعان حیدر کرار کی قدر و قیمت کا پتہ چل گیا ہے اور انہیں شدّت سے یہ احساس ہوگیا ہے کہ شیعیانِ حیدر کرّار کو اعتماد میں لئے بغیر کوئی فیصلہ نہیں کیا جاسکتا۔ انہوں نے کہا کہ اب ہمیں بھی شعوری طور پر اس پیغام کو دوسروں تک پہنچانا چاہیے کہ ایک کمزور ملت اپنے زمانے کے امام کی ناصر نہیں ہوسکتی۔
