وہابی دہشت گردوں کے گرد گھیرا تنگ / تکفیری تنظیموں سے وابستہ متعدد شدت پسند ہلاک
ایکنا نیوز- ایکسپریس نیوزکے مطابق کراچی کے علاقے پپری میں پولیس اور حساس اداروں نے مشترکہ کارروائی کرتے ہوئے کالعدم لشکر جھنگوی کے 8 مبینہ دہشت گردوں کو ہلاک کردیا۔ ایس ایس پی راؤ انوار کے مطابق پہلے سے گرفتار دہشت گردوں نعیم بخاری اور فاروق بھٹی کی نشان دہی پر پپری میں چھاپہ مارا گیا تو علاقے میں واقع مکان میں موجود دہشت گردوں نے پولیس اہلکاروں پر فائرنگ اور دستی بموں سے حملہ کردیا جس پر مزید نفری کو طلب کرکے علاقے میں آپریشن کیا گیا اور اس دوران پولیس سے فائرنگ کے تبادلےمیں 8 دہشت گرد ہلا ک گئے۔
ایس ایس پی ملیر راؤ انوار کا کہنا تھا کہ کارروائی کے دوران دہشت گردوں کی فائرنگ سے 2 پولیس اہلکار بھی زخمی ہوئے جنہیں طبی امداد کے لیے اسپتال منتقل کردیا گیا۔ راؤ انوار کے مطابق ہلاک ملزمان میں سے 5 کی شناخت سہیل چشماٹو، بلال، خلیل، طلحہٰ اور عبدالسلام کے نام سے ہوئی جو دہشت گردی کی کارروائیوں سمیت دیگر جرائم میں ملوث تھے اور ان کے خلاف مختلف تھانوں میں مقدمات بھی درج تھے جب کہ سندھ حکومت نے ان کے سروں کی قیمت مقرر کر رکھی تھی۔
راؤ انوار کے مطابق سہیل چشماٹو 4 ڈی ایس پیز کے قتل میں ملوث ہے جب کہ دہشت گردوں ک ٹھکانے سے 2 پریشر ککر بم، خودکش جیکٹس، بم بنانے کا سامان اور چھینی گئی سرکاری ایس ایم چیز بھی برآمد ہوئی ہیں۔ پولیس نے دہشت گردوں کی لاشوں کو تحویل میں لے کر ضابطے کی کارروائی شروع کردی گئی ہے۔
