صوفیاء کرام نے شریعت پر پابندی کا درس دیا ‘ خالد مسرت

بین الاقوامی گروپ: دہشتگرد ی ،تعصب اور فرقہ واریت کے خاتمے کیلئے صوفیاکی تعلیمات کو مشعل راہ بنانا ہو گا، خطاب

ایکنا نیوز- دنیا نیوز کے مطابق مرکزی نعت کونسل کے صدر چوہدری خالد اقبال مسرت نے بڑی گیارہویں تقریب سے خطاب کرتے ہوئے کہا ہے کہ حضرت شیخ سید محی الدین عبدالقادر جیلانی ؒ و دیگر صوفیائے کرام کی زندگیوں اور تعلیمات کو اگر مشعل ِ راہ بنایا جائے تو دہشت گردی و فرقہ واریت سے نجات حاصل کی جاسکتی ہے ، شیخ عبدالقادر جیلانی ؒ نے اسلام کے تحفظ ، بقا و دین کے نفاذ و غلبے اور اسکی نشرواشاعت سے متعلق گراں قدر خدمات سرانجام دی اور معاشرے کی اصلاح میں ناقابل ِ فراموش کردار اداکیا ۔

ان کی شبانہ روز جدوجہد سے اسلام کی سسکتی روح کو توانائی ملی ۔انہوں نے کہا کہ شیخ عبدالقادر جیلانی ؒ نے اﷲ کا تقویٰ اطاعت اور احکام شریعت پر پابندی کا درس دیا ۔سابق صدر بار قاضی خاور حسین اعوان ایڈووکیٹ نے اپنے خطاب میں کہا کہ شیخ عبدالقادر جیلانی ؒ کی بڑائی کا راز آپ کی عبادت و ریاضت ، اتباع سنت، زہد و تقویٰ اور علم و فضل میں پوشیدہ ہے ۔ 

آپ کے حالات زندگی سے فکر و فلسفہ تعلیمات و ہدایت کو سمجھنے میں مدد ملتی ہے ۔ پروفیسر سید طارق سعید شاہ نے کہاکہ حضرت پیر دستگیرغوث پاک ؒ کی ذات سراپا عمل بھی تھی اور اعلیٰ اقدار مجسمہ بھی ۔ان کی زندگی سراپا صدق و یقیں تھی ۔انہوں نے جس طرح دین اسلام کی خدمات سرانجام دیں وہ اپنی جگہ بے مثال ہے ۔تقریب کے اختتام پر ملکی سلامتی و بقا کیلئے دعا کرائی گئی ۔