سال 2025 میں لاکھوں زائرین کا دورہ قرآنی مرکز
ایکنا نیوز- عاجل نیوز کے حوالے سے بتایا گیا ہے کہ یہ ادارہ مدینہ منورہ کے اہم ترین زیارتی مقامات میں شمار ہوتا ہے اور سال 2025 میں اندرون و بیرونِ ملک سے قریب ایک ملین افراد نے اس کا دورہ کیا۔
زائرین کو اس مجمع میں قرآنِ کریم کی خدمت کے لیے سعودی عرب کی کوششوں، نیز دنیا کی مختلف زبانوں میں قرآن کی طباعت اور اشاعت کے حوالے سے کی جانے والی سرگرمیوں سے آگاہ کیا گیا۔
یہ وسیع عوامی پذیرائی سعودی عرب کی جانب سے قرآنی سرگرمیوں کی سرپرستی، انسانی و فنی صلاحیتوں کے مؤثر استعمال اور اعتدال پسندی کے فروغ کے ساتھ اسلام اور مسلمانوں کی خدمت کے عزم کا مظہر ہے۔
مجمعِ قرآنِ ملک فہد، جو اسلامی دنیا کی اہم ترین تنصیبات میں شمار ہوتا ہے، اب تک بارہ ملین سے زائد قرآنِ کریم کے نسخے اور ان کے مختلف زبانوں میں تراجم شائع کر چکا ہے۔ اس کے علاوہ، قرآنِ کریم کے ڈیجیٹل اور صوتی نسخے بھی الیکٹرانک پلیٹ فارمز اور اسمارٹ ایپلی کیشنز کے ذریعے شائقین کے لیے دستیاب کرائے گئے ہیں۔
یہ مجمع دنیا کا سب سے بڑا مرکز ہے جو قرآنِ کریم کی طباعت اور تقسیم کا فریضہ انجام دیتا ہے، اور 30 اکتوبر 1984ء کو مدینہ منورہ میں اس کا افتتاح ہوا تھا۔
یہ ادارہ سعودی عرب کے اہم ترین عصری ثقافتی و دینی مراکز میں شمار ہوتا ہے اور دنیا بھر، خصوصاً اسلامی ممالک میں، مختلف قراءتوں کے مطابق قرآنِ کریم کے مستند نسخوں کی طباعت اور تقسیم میں کلیدی کردار ادا کر رہا ہے۔
اس مرکز کا بنیادی مشن متواتر قراءتوں کے مطابق قرآنِ کریم کی طباعت اور تقسیم ہے، جنہیں اسلامی علما اور علومِ قرآنی کے ماہرین کی توثیق حاصل ہے۔ ابتدائی مسودہ خطاط کی تیاری کے بعد متن کو حرف بہ حرف اور لفظ بہ لفظ نہایت باریکی سے جانچا جاتا ہے اور منظور شدہ نمونے سے اس کا تقابل کیا جاتا ہے۔ یہ عمل قرآنی نسخوں کی تطبیق و جانچ کی علمی کمیٹی کی نگرانی میں انجام پاتا ہے، جس میں عالمِ اسلام کے معروف قاریوں کی ریکارڈ شدہ تلاوتوں سے بھی استفادہ کیا جاتا ہے۔
طباعت کی نگرانی کا نظام بھی کئی مراحل پر مشتمل ہے، جس میں ابتدائی جانچ کے ساتھ ساتھ طباعت کے دوران مسلسل نگرانی اور آخری نمونوں کا تفصیلی معائنہ بھی شامل ہوتا ہے۔/
4327313
