سال 2025 میں ۱۹.۵ عمرہ زائرین کی سعودی آمد

ایکنا: سعودی عرب کے مرکزِ قومی «اَداء» نے اعلان کیا ہے کہ سال 2025 میں سعودی عرب نے 1 کروڑ 95 لاکھ غیر ملکی حجاج و معتمرین (حجِ تمتع اور عمرۂ مفردہ) کی میزبانی کی ہے۔

ایکنا نیوز- سعودی عرب کی سرکاری خبر رساں ایجنسی واس کے مطابق فراہم کی گئی خدمات پر زائرین کے اطمینان کی شرح 90 فیصد سے زائد رہی، جو کئی حوالوں سے غیر معمولی اور ریکارڈ ساز اشاریات پر مشتمل ہے۔ یہ اعداد و شمار سعودی وژن 2030 کے اہداف کے تحت حرمین شریفین کے زائرین کے لیے خدماتی نظام کی تیز رفتار ترقی کی واضح عکاسی کرتے ہیں۔

سعودی حکام کے مطابق، موسمِ حج کے دوران وسیع سماجی شمولیت دیکھنے میں آئی اور ایک لاکھ 84 ہزار سے زائد رضاکاروں نے رہنمائی، تنظیمی امور اور انسانی خدمات میں حصہ لیا۔ یہ اقدام قومی تعاون اور ایثار کے جذبے کی علامت ہے اور خانۂ خدا کے مہمانوں کی خدمت میں سماجی اقدار کو مضبوط کرتا ہے۔

حکام نے مزید بتایا کہ زائرینِ حرمین کی خدمت کی کوششیں صرف سہولیات تک محدود نہیں رہیں بلکہ دینی اور ثقافتی تجربے کو مضبوط بنانے تک پھیل گئیں۔ اس سلسلے میں مکہ مکرمہ اور مدینہ منورہ میں سیرتِ نبویؐ سے متعلق 18 تاریخی مقامات کو ترقی دی گئی، جس سے روحانی اثرات میں گہرائی پیدا ہوئی اور حجاج کے سفر کو معرفتی و ثقافتی پہلو بھی حاصل ہوا۔

اسی تناظر میں «خدمت ضیوف الرحمن» (خانۂ خدا کے مہمانوں کی خدمت) پروگرام نے اعلان کیا کہ یہ نمایاں پیش رفت حجِ تمتع اور عمرۂ مفردہ دونوں کو محیط ہے۔ اعداد و شمار کے مطابق حجِ تمتع کے زائرین کی اطمینان کی شرح 91 فیصد جبکہ عمرہ ادا کرنے والوں کی شرحِ اطمینان 94 فیصد تک پہنچ گئی ہے۔

یہ اعداد و شمار منصوبہ بندی، عمل درآمد اور 60 سے زائد اداروں کے باہمی اشتراک کے اعلیٰ معیار کی عکاسی کرتے ہیں، جنہوں نے مکمل ہم آہنگی کے ساتھ زائرینِ بیت اللہ کو سفر کے تمام مراحل میں یکجا اور مؤثر خدمات فراہم کیں۔/

4331832