یورپ کے قلب میں عاشورا کے پرچم لہرائے گئے
ایکنا نیوز- العالم نیوز چینل کی رپورٹ کے مطابق گزشتہ دنوں لندن، اوسلو، جینوا، ہمبرگ، روم، برسلز اور اسٹاک ہوم سمیت یورپ کے مختلف شہروں کی سڑکیں اور اسلامی مراکز عزادارانِ امام حسینؑ سے بھرے رہے۔ مختلف قومیتوں اور زبانوں سے تعلق رکھنے والے افراد نے سیدالشہداءؑ کے پرچم تلے جمع ہوکر اس عظیم حماسے کی یاد تازہ کی جو صدیوں بعد بھی دنیا کے آزاد انسانوں کے لیے مشعلِ راہ ہے۔
ان تقریبات میں سب سے شاندار اجتماع اوسلو میں منعقد ہوا، جہاں تقریباً دو ہزار شیعہ اور اہلِ بیتؑ کے محب مختلف قومیتوں اور پس منظر کے ساتھ "عاشوراتوگ" نامی جلوس میں شریک ہوئے۔ شرکاء نے میدانِ کربلا میں حضرت امام حسینؑ اور ان کے وفادار ساتھیوں کی استقامت، شجاعت اور قربانیوں کو خراجِ عقیدت پیش کیا۔
اوسلو کے جلوس میں "لبیک یا خامنہای" کے نعرے بھی سنائی دیے، جبکہ بعض عزادار اسلامی جمہوریہ ایران کے پرچم اٹھائے ہوئے تھے۔ اس منظر نے عاشورا کے پیغام اور عصر حاضر میں ظلم، قبضے اور استبداد کے خلاف مزاحمت کے درمیان تعلق کو اجاگر کیا۔
تقریب کی تصاویر سے ظاہر ہوتا ہے کہ حسینی نعروں اور مزاحمت کے پیغام نے ناروے کے دارالحکومت کی فضا کو معطر کر رکھا تھا، جبکہ سرخ و سیاہ عاشورائی پرچموں کے ساتھ ایرانی پرچم بھی لہرائے گئے۔
گزشتہ اتوار ہیگ میں بھی عاشورائے حسینی کا جلوس منعقد ہوا، جبکہ آج جمعرات کو ہمبرگ عاشورائی جلوس کا میزبان بنا۔ اسی طرح برسلز میں واقع مہدیہ مرکز نے 25 خرداد سے فارسی زبان عزاداروں اور دیگر محبانِ اہلِ بیتؑ کی شرکت سے عشرۂ محرم کی تقریبات کا آغاز کیا۔
اسٹاک ہوم اور سویڈن کے دیگر شہروں میں بھی فارسی، عربی اور سویڈش زبانوں میں مجالسِ عزا منعقد ہوئیں، جنہوں نے مختلف نسلوں سے تعلق رکھنے والے مسلمان مہاجرین کو سیدالشہداءؑ کے پرچم تلے یکجا کیا۔
برلب میں عظیم عاشورائی جلوس آئندہ ہفتے ہفتہ کے روز منعقد ہوگا۔ منتظمین نے تمام آزاد انسانوں اور ظلم کے مخالف افراد کو اس تاریخی اجتماع میں شرکت کی دعوت دی ہے تاکہ جرمنی کے دارالحکومت میں "ہیہات منا الذلہ" کے ابدی پیغام کو بلند کیا جا سکے۔
دوسری جانب برطانیہ میں بھی اسلامی سنٹر سمیت درجنوں مساجد، امام بارگاہوں اور دینی مراکز میں تاسوعا اور عاشورائے حسینی کی مجالس منعقد کی جا رہی ہیں، جبکہ مرکزی عاشورائی جلوس جمعہ کے روز لندن کے مرکز میں نکالا جائے گا۔/
4360382
