اسلامی سیاحت میں ملایشیاء سرفہرست
ایکنا نیوز- عکاظ نیوز کی رپورٹ میں بتایا گیا ہے کہ ملائیشیا نے مسلسل کئی برسوں سے "ماسٹرکارڈ–کریسنٹ ریٹنگ گلوبل مسلم ٹریول انڈیکس 2025" میں پہلی پوزیشن برقرار رکھتے ہوئے دنیا کے بہترین حلال سیاحتی مقام کے طور پر اپنی حیثیت مزید مستحکم کر لی ہے۔
رپورٹ کے مطابق، اس درجہ بندی نے خلیجی تعاون کونسل (GCC) کے رکن ممالک کے سیاحوں کے لیے ملائیشیا کی کشش میں مزید اضافہ کیا ہے۔ یہ وہ سیاح ہیں جو حلال سیاحت کے اصولوں کے مطابق، خاندانی ماحول، ثقافتی تنوع اور اعلیٰ معیار کی سہولیات پر مشتمل سفری تجربات کو ترجیح دیتے ہیں۔
ملائیشیا میں حلال ریستورانوں کی فراوانی، نماز کی ادائیگی کے لیے آسان سہولیات، معروف مہمان نوازی اور جدید سیاحتی انفراسٹرکچر نے اسے مسلم سیاحوں کی پسندیدہ منزلوں میں نمایاں مقام دلایا ہے۔
دبئی میں ملائیشیا کے سیاحتی دفتر کے ڈائریکٹر محمد فخرالدین حاتمن نے کہا کہ ملائیشیا کا مسلم سیاحت کی فہرست میں سرفہرست آنا اس بات کا ثبوت ہے کہ ملک خلیجی ممالک سے آنے والے سیاحوں کو آسان، محفوظ اور خوشگوار سفری تجربہ فراہم کرنے کے لیے پُرعزم ہے۔
انہوں نے مزید کہا کہ حلال سہولیات اور بہترین مہمان نوازی کے علاوہ ملائیشیا سیاحوں کو متنوع تفریحی مواقع بھی فراہم کرتا ہے، جن میں ثقافتی میلوں، تاریخی شہروں، دلکش قدرتی مناظر، خاندانی تفریحی مراکز اور مقامی ثقافتوں سے روشناس ہونے کے منفرد مواقع شامل ہیں۔
حاتمن نے کہا کہ ملائیشیا عرب ممالک سے مزید سیاحوں کے استقبال کے لیے مکمل طور پر تیار ہے تاکہ وہ سال بھر اس ملک کے متنوع سیاحتی مقامات کی سیر کریں اور اپنی یادگار سفری یادیں ساتھ لے جائیں۔
ملائیشیا آنے والے سیاح سراواک کے ٹھنڈے پہاڑی علاقوں، پینانگ کی تاریخی گلیوں، کوالالمپور کے خاندانی تفریحی مراکز اور ملک کے خوبصورت ساحلوں اور استوائی جزائر سے لطف اندوز ہو سکتے ہیں۔/
4365363
