روس میں موٹے جسم اور شوگر بیماری کے لیے حلال میڈیسن تیار
ایکنا نیوز- gxpnews کی رپورٹ کے حوالے سے بتایا گیا ہے کہ روسی دوا ساز کمپنی گروفارم نے ذیابیطس ٹائپ 2 اور وزن میں کمی کے علاج کے لیے تیار کی جانے والی اپنی ادویات کے لیے حلال سرٹیفکیٹ حاصل کر لیا ہے۔ یہ سرٹیفکیٹ روسی فیڈریشن کے مسلمانوں کے زیر انتظام بین الاقوامی حلال معیاری سازی و سرٹیفکیشن مرکز نے جاری کیا ہے۔
اس سرٹیفکیٹ کے حصول کے بعد اس کمپنی کی ادویات روس میں GLP-1 کلاس کی پہلی ادویات بن گئی ہیں جو اسلامی اصولوں اور حلال معیار کے مطابق قرار دی گئی ہیں۔
حلال سرٹیفکیٹ ان ادویات کو دیا جاتا ہے جن میں شرعاً ممنوع اجزاء شامل نہ ہوں، جیسے کہ ایتھانول (الکحل)، خون، خنزیر کے خلیات یا بافتیں، اور ایسے جانوروں سے حاصل شدہ اجزاء جو اسلامی طریقے کے مطابق ذبح نہ کیے گئے ہوں۔ مذکورہ ادویات کی تیاری پیپٹائڈ سنتھیسز (Peptide Synthesis) کے طریقہ کار کے ذریعے کی جاتی ہے، جس میں حیوانی ماخذ سے حاصل شدہ خام مال استعمال نہیں کیا جاتا۔
روس میں اسلام پیروکاروں کی تعداد کے اعتبار سے دوسرا بڑا مذہب ہے۔ بہت سے مسلمان مریضوں کے لیے علاج کے انتخاب میں حلال سرٹیفکیٹ ایک اہم معیار بن چکا ہے، جس سے معالجین بھی مذہبی تحفظات کے بغیر ان ادویات کو تجویز کر سکتے ہیں۔
اس سے قبل 2024 میں بھی Geropharm روس کی پہلی دوا ساز کمپنی بنی تھی جس نے اپنی انسولین کی مصنوعات کے لیے حلال سرٹیفکیٹ حاصل کیا تھا۔ اس وقت کمپنی نے وضاحت کی تھی کہ اس کی جدید انسولین حیوانی ذرائع سے حاصل نہیں کی جاتی بلکہ خرد حیات (Microorganisms) کے ذریعے تیار کی جاتی ہے، جس سے ماضی میں خنزیر سے حاصل شدہ انسولین کے استعمال سے متعلق مذہبی خدشات ختم ہو جاتے ہیں۔
واضح رہے کہ بین الاقوامی حلال معیاری سازی و سرٹیفکیشن مرکز، جو روسی فیڈریشن کے مسلمانوں کی روحانی انتظامیہ کے زیر نگرانی کام کرتا ہے، روس کا واحد مجاز ادارہ ہے جو مصنوعات کی اسلامی اصولوں سے مطابقت کی تصدیق کرتا ہے۔ اس پیش رفت کو روس میں حلال ادویات کی صنعت کے فروغ اور مسلمان مریضوں کے لیے علاج کے مزید مواقع فراہم کرنے کی جانب ایک اہم قدم قرار دیا جا رہا ہے۔/
4360651
