ایکنا نیوز- عاجل نیوز کے مطابق یہ دورہ مقابلے میں شریک افراد کے لیے ترتیب دیے گئے خصوصی ثقافتی پروگرام کا حصہ تھا اور مکہ مکرمہ میں مسجد الحرام کے صحن میں مقابلے کے آخری مراحل مکمل ہونے کے بعد کیا گیا۔

مختلف براعظموں کے 133 ممالک سے تعلق رکھنے والے 334 مرد و خواتین شرکا نے مجمع کی مختلف تنصیبات، شعبہ جات اور قرآن کریم کی طباعت کے مراحل کا جائزہ لیا۔ انہیں قرآن کریم کی طباعت کے مختلف مراحل کے ساتھ ساتھ طباعت شدہ نسخوں کی نظرثانی اور حتمی تیاری کے لیے استعمال ہونے والے جدید آلات سے بھی آگاہ کیا گیا۔

شرکا کو مجمع کی قرآنی اشاعتوں، قرآن کریم کی 80 سے زائد زبانوں میں طباعت و ترجمے اور دنیا بھر میں مجمع کی مطبوعات کی تقسیم کے حوالے سے کی جانے والی کوششوں کے بارے میں بھی بریفنگ دی گئی۔

دورے کے شرکا نے قرآن کریم کی خدمت کے لیے مجمعِ ملک فہد کی جدید سہولیات اور تخصصی سرگرمیوں کو سراہا اور قرآن کریم کی نگہداشت، طباعت، اشاعت اور تعلیم کے شعبوں میں سعودی عرب کی کوششوں کی بھی تعریف کی۔

بدھ کو سعودی عرب میں قرآنی مقابلے کی اختتامی تقریب

دریں اثنا، سعودی عرب کی وزارتِ اسلامی امور، دعوت و ارشاد نے 46ویں بین الاقوامی ملک عبدالعزیز حفظ، تلاوت و تفسیر قرآن کریم مقابلے کے آخری مرحلے کے اختتام کا اعلان کیا ہے۔ مکہ مکرمہ کی مسجد الحرام میں منعقد ہونے والے اس مقابلے میں مرد و خواتین ججز کے پینل نے فرائض انجام دیے، جبکہ دنیا کے 133 ممالک سے تعلق رکھنے والے 334 شرکا نے تلاوت پیش کی۔

اس سال کے مقابلے کی نمایاں خصوصیت مجموعی انعامی رقم میں اضافہ بھی ہے، جو بڑھ کر 1 کروڑ 26 لاکھ سعودی ریال ہو گئی ہے، جبکہ انعام حاصل کرنے والے افراد کی تعداد بڑھا کر 50 کر دی گئی ہے، یعنی مقابلے کی پانچوں کیٹیگریز میں سے ہر ایک میں 10 کامیاب امیدواروں کو انعام دیا جائے گا۔

مقابلے کی اختتامی تقریب بدھ، کو مسجد الحرام میں سعودی فرمانروا شاہ سلمان بن عبدالعزیز آل سعود کی نگرانی میں منعقد ہوگی، جس میں پانچوں شعبوں کے نمایاں کامیاب امیدواروں کو اعزازات سے نوازا جائے گا۔

واضح رہے کہ 46ویں بین الاقوامی ملک عبدالعزیز مسابقاتِ حفظ، تلاوت و تفسیر قرآن کریم کا آغاز جمعرات، کو مکہ مکرمہ میں ہوا تھا۔ مقابلے کا مقصد مسلمان نوجوانوں کو قرآن کریم حفظ کرنے، اسے سمجھنے اور اس میں تدبر کرنے کی ترغیب دینا اور ایک منصفانہ قرآنی مسابقت کا ماحول فراہم کرنا ہے۔

مدینہ منورہ میں واقع مجمعِ ملک فہد برائے طباعتِ قرآن کریم کا افتتاح 30 اکتوبر 1984ء کو ہوا تھا۔ تقریباً چار دہائیوں کی سرگرمیوں کے بعد یہ ادارہ آج دنیا میں قرآن کریم کی طباعت کا سب سے بڑا مرکز بن چکا ہے۔/

4370228