Həccdə ilahi şüarlar: Mənəvi və tövhid simvolları
Qurani-Kərim “Maidə” surəsinin 2-ci ayəsində möminlərə xəbərdarlıq edir ki, ilahi ayinlərə və haram aylara, eləcə də hədiyyələrə, qurbanlara və Allah evini ziyarət edənlərə hörmətsizlik etməsinlər. Bu ayədə buyurulur: “Ey iman gətirənlər! Allahın nişanələrinə, haram aylara, qurbanlıq heyvana, boynuna nişan taxılmış qurbanlıq heyvanlara, Rəbbinin lütfünü və razılığını diləyərək Beytulharama gələnlərə qarşı hörmətsizlik etməyi halal saymayın. İhramdan çıxdığınız zaman ov edə bilərsiniz. Sizi Məscidulharama daxil olmağa qoymayan camaata qarşı olan kin-küdurət sizi təcavüz etməyə sövq etməsin. Yaxşılıq etməkdə və Allahdan qorxmaqda bir-birinizə yardım edin. Günah işlər görməkdə və düşmənçilikdə bir-birinizə köməkçi olmayın. Allahdan qorxun. Həqiqətən, Allah şiddətli cəza verəndir”.
Həmçinin “Həcc” surəsinin 36-cı ayəsində qurban kəsmək ilahi ayinlərdən hesab olunur: “Bu qurbanlıq dəvələri də sizin üçün Allahın dininin ayinlərindən etdik və onlarda sizin üçün xeyir vardır”. Şüarlara bu vurğu onu göstərir ki, Həccin zahiri ayinləri sadəcə simvolik əməllər deyil, mənəvi və tövhid mənaları ilə dərindən bağlıdır. Bu əlamətlərə diqqət yetirmək möminlərin şüarlarına ehtiram və təqva əlaməti hesab olunur.
Quran nöqteyi-nəzərindən həcc mərasimləri elədir ki, onların hamısında ilahi əzəmətin təsirləri açıq-aydın görünür. Ona görə də insan bu hüdudların və ritualların bütün xüsusiyyətlərini diqqətlə qorumalı və tətbiq etməlidir. Bir əməl səhv edilməməlidir. Belə bir xəta həm zahiri əməli batil edər, həm də batini olaraq Allahın hüzurundan uzaqlaşmağa səbəb olar. Şübhəsiz ki, bu hədlərə riayət etmək qəlblərin təqva nişanələrindən və Allah yolunda Ehsan etməyin təzahürlərindəndir.
