İraq seçkilərinin nəticələri: Şiə cərəyanlarının üstünlüyü
“İQNA”-nın “İNA” agentliyinə istinadən verdiyi xəbərə görə, 2025-ci il İraq parlament seçkiləri son iyirmi ilin ən mühüm siyasi mərhələlərindən biri idi. Əvvəlki dövrlə müqayisədə daha çox seçicinin iştirakı ilə keçirilən seçkilərdə İraq mənbələrinin bildirdiyinə görə, səsvermə hüququna malik olanların 56 faizindən çoxu iştirak edib. Bu, İraq vətəndaşlarının yenidən seçki qutusuna güvən göstərməsi və ölkənin gələcək istiqamətinin müəyyənləşdirilməsində həlledici rol oynaması deməkdir.
Bu iştirak 2021-ci il seçkiləri ilə müqayisədə 14 faizdən çox artım göstərir və bu da ictimai etimadın demokratik prosesə və dövlət institutlarına geri qayıtdığını göstərir.
Seçkilər İraqın təhlükəsizlik, iqtisadi və regional-beynəlxalq təzyiqlərlə üzləşdiyi bir zamanda keçirildi. Xalqın iştirakı yalnız gələcək parlament və hökumətin legitimlik əsasını gücləndirmir, həm də daxili siyasi sabitlik, milli qərarların həmrəyliyi və mərkəzi hökumətin regional və beynəlxalq arenadakı mövqeyinin möhkəmlənməsi baxımından açıq bir mesaj verir.
Seçkilərin boykot çağırışı və Sədr cərəyanının məğlubiyyəti
Bu seçkilərin diqqətəlayiq məqamlarından biri Sədr cərəyanının və şəxsən Müqtəda Sədrin seçkiləri boykot çağırışı idi. Bu cərəyan tərəfdarlarını səsvermədə iştirak etməməyə çağırmışdı. Lakin statistika göstərir ki, bu çağırış uğursuz olub və seçicilərin 55 faizdən çox iştirakı – 2021-ci ildəki 41 faizlə müqayisədə – göstərir ki, İraq vətəndaşları siyasi təzyiqlərə baxmayaraq, öz nümayəndələrini seçmək üçün qanuni və demokratik yolu seçiblər.
Müşahidəçilərin fikrincə, boykotun uğursuzluğu xalqın siyasi qərarvermə prosesinə qayıdışının və İraqda demokratiyanın təməl prinsiplərinin güclənməsinin göstəricisidir.
Şiə ittifaqlarının üstün mövqeyi və siyasi balansın dəyişməsi
Hesabata əsasən, “Bərpa və İnkişaf” ittifaqı 46 mandatla birinci, “Dövlət Qanunu” (Dawlat al-Qanun) 30 mandatla ikinci, “Sadiqlər Hərəkatı” (Əs-Sadiqun) 27 mandatla üçüncü, və “Bədr Təşkilatı” 18 mandatla dördüncü yerdə qərarlaşıb.
Bundan əlavə, “Dövlət Gücü” (Qüvəd-Dövlə) 18 mandat, “Hüquq” 6 mandat, “Əl-Əsas” 8 mandat, “İşraq Kənon” 8 mandat, “Təsim” 6 mandat və “Əbşir ya İraq” 4 mandat əldə edib.
Bu nəticələr şiə və mərkəzi hökumətə yaxın qüvvələrin mövqelərinin möhkəmləndiyini və gələcək parlamentdə üstünlük qazandıqlarını göstərir. Bu da daxili siyasi balansın dəyişməsinə, qərarların daha koordinasiyalı qəbuluna və hökumətin daxili və regional siyasətdə güclənməsinə şərait yaradır.
İraq Hizbullahı: Müqavimət namizədləri parlamentə daxil olur
İraqın müqavimət qruplarından “Kətaib Hizbullah” bəyanat yayıb ki, parlamentdə yer qazananların əksəriyyəti müqavimət mənşəli və onun orijinal yoluna sadiq şəxslərdir.
Qrupun baş katibi Əbu Hüseyn əl-Humeydavi bəyanatda bildirib:
“Xalqın bütün təbəqələrinin nümayəndələrini seçmək üçün geniş iştirakı göstərdi ki, bu millət canlı və layiqli bir xalqdır.”
Bəyanatda həmçinin deyilir:
“Öz ləyaqəti və xalqının gələcəyi naminə səmimi şəkildə vəzifəsini yerinə yetirən hər kəsə təşəkkür edirik. Seçkilərdə qalib gələnlərin hamısı bizim əziz qardaşlarımızdır və onların sevincinə şərikik. Ən çox sevindirən məqam odur ki, parlamentdə yer qazananların çoxu İslam müqavimətinə mənsub və bu yolun sadiq davamçılarıdır. Əgər bəzi qaliblər arasında mühüm vəzifələrə təyin olunacaq şəxslərlə bağlı müəyyən qeydlərimiz varsa, Allahın köməyi ilə şiə ittifaqlarının böyük koalisiyası – “Çərçivə Koalisiyası” ilə birgə məsuliyyət ruhunda bu məsələləri həll edəcəyik.”
4316531
