IQNA, SalamNews-a istinadla xəbər
verir ki, Həzrət Məhəmməd peyğəmbərin (s) doğum günü miladi tarixi ilə 570-ci
ildə, yerli tarixi təqvimə əsasən isə "fil ili”nin rəbiul-əvvəl ayına təsadüf
edir. Məhəmməd (s) peyğəmbərin dünyaya göz açmasının cümə gününə təsadüf etməsi
qətiləşsə də, onun rəbiul-əvvəlin dəqiq neçəsində doğulduğu qətiləşməyib. İslam
alimləri əsasən 12 və 17 rəbiul-əvvəl tarixlərini daha çox həqiqətə uyğun hesab
edirlər.
Məhəmməd (s) peyğəmbər doğulan zaman artıq atası Abdullah bin Əbdül-Müttəlib
dünyadan getmişdi. Yetim Məhəmməd 6 yaşında ikən anası Aminəni də itirir. Onun
qəyyumluğunu babası, daha sonra isə əmisi Əbu-Talib öhdəsinə götürür.
Cahiliyyətin və nadanlığın hökm sürdüyü Məkkədə gününü çobanlıqla (çox az bir
qismini ticarət) keçirmiş Məhəmmədə vəhyin nazil olması, ərəb əyanlarını həsədə
və paxıllığa düçar edirdi. Onlar ümumiyyətlə peyğəmbərliyin əyanlara məxsus
olduğu iddiasında idilər. Lakin uca Allahın hikməti belə tələb edirdi ki,
sonuncu səmavi dinini ehtiva edən, qeybdən və gələcəkdən xəbər verən ilahi
vəhy, məktəb, müəllim, yazma, oxuma bilməyən, olduğu cəmiyyətdə düzgün, dürüst
və əmanətdar kimi tanınan birinə verilsin. Bu şərtlərin hamısı yalnız gənc
Məhəmməddə cəmləşirdi. Məhz bu səbəbdən idi ki, bütpərəstlər Məhəmmədi "sən bu
Quranı özün yazmısan” , "sən özün bunları bilirsən” deməklə ittiham edə
bilmirdilər.
Bu gün Azərbaycan da daxil olmaqla bir çox dünya ölkələrində Məhəmməd (s)
peyğəmbər və altıncı imamın doğum günü ilə bağlı tədbirlər keçirilir.
"Mövlud Günü"nün əməlləri:
Əhli-beytin (ə) nəzərinə görə Peyğəmbərimiz (s) bu günü dünyaya gəlmişdir. Çox
mübarək gecədir. Bu gecənin bir neçə əməlləri vardır:
1. 17-ci günün niyyəti ilə qüsl almaq.
2. Oruc tutmaq. Allah bu oruc üçün bir ilin oruc savabını müəyyən etmişdir.
3. Sədəqə vermək, ehsan etmək və mömini sevindirmək.
4. Həzrətin (s) ziyarətini oxumaq. Həzrətdən (s) belə bir hədis vardır: "Hər
kim öləndən sonra mənim qəbrimi ziyarət edərsə, həyatda ikən mənə tərəf hicrət
edən şəxs kimi olar. Əgər məni yaxından ziyarət edə bilmirsə, uzaq yoldan mənə
salam göndərsin”.
5. Bu günü İmam Əlini (ə) ziyarət etmək də
müstəhəbdir. Necə ki, İmam Sadiq (ə) həmin günlərdə İmam Əlini (ə) ziyarət
etmişdi.
6. Bu günü əziz tutmaq lazımdır. Yaxşı olar ki, müsəlmanlar o günü bayram
təşkil etsinlər. Həzrət Peyğəmbərin (s) əxlaqı, həyatı və sünnəti ilə daha
yaxından tanış olsunlar.
Bu gün həm də əziz 6-cı İmamımız Həzrət Sadiqin (ə) də mövlud günüdür.