Qədr gecəsi nədir?
Qədr gecəsi Quranın nazil olduğu gecədir. İslam dininin əsas mənbəyi olan Quranın nazil olduğu gecə olması Qədr gecəsinə böyük əhəmiyyət verir.
Qədr gecəsi təkcə Quranın nazil olduğu gecə deyil, həm də gələn ilin işlərinin müəyyən olunduğu gecədir. “Qədr” sözü qismət mənasındadır və insanların taleyinin bu gecədə müəyyən olunduğu fikrini əks etdirir.
Qurani-Kərimdə Qədr gecəsinin çox böyük və əhəmiyyətli bir gecə olduğu bildirilir. Quran ayələrindən belə başa düşülür ki, Qədr gecəsi mübarək Ramazan ayındadır. "Ramazan ayı insanların bələdçisi, aşkar hidayət dəlillərinə malik və (haqq ilə batili bir-birindən) ayıran Qur’anın nazil olduğu bir aydır. Buna görə də sizdən bu ayı görən (öz vətənində olan) kəs, onu (o ayı) oruc tutmalıdır. Xəstə, yaxud səfərdə olan kəs isə başqa günlərdə bir neçə gün (oruc tutmadığı günlərin sayı qədər oruc tutmalıdır). Allah sizin üçün asanlıq istəyir, sizin üçün çətinlik istəmir. Həmçinin (istəyir ki,) müəyyən olunmuş miqdarı (otuz günü) tamamlayasınız və sizi hidayət etməsinin şükrü olaraq «təkbir» deyərək Allahı əzəmətli sayasınız, bəlkə (Onun) şükrünü yerinə yetirə bildiniz" (Bəqərə, 185).
“Qədr” surəsinin 1-ci ayəsini oxuyuruq: “Biz onu (Quranı) Qədr gecəsində nazil etdik”.
Bu iki ayədən belə başa düşülür ki, Qədr gecəsi Ramazan ayındadır. Lakin mübarək Ramazan ayının hansı gecəsinin Qədr gecəsi olması bilinmir. Sünnilər Qədr gecəsinin Ramazan ayının son on gecəsindən biri olduğunu, daha çox 27-ci gecə olduğunu düşünürlər. Şiələr isə Ramazan ayının 19, 21 və ya 23-cü gecələrindən biri olduğuna inanırlar.
Qədr gecəsi İslam mədəniyyətində ilin ən mühüm gecəsi sayılır və Peyğəmbərimizin (s) rəvayətinə görə, Allahın müsəlmanlara bərəkəti və əvvəlki ümmətlərin heç birinə verilməmiş bir hədiyyədir.
Qurani-Kərimdə Qədr surəsi bütünlüklə bu müqəddəs gecənin izahına və tərifinə həsr olunub və Qədr gecəsinin dəyərinin min aydan artıq olduğu bildirilir. “Duxan” surəsində Qədr gecəsinin müqəddəs və bərəkətli bir gecə olduğu bildirilir.
