İngiltərədə İslamofobik nifrət cinayətləri iki dəfə artıb
Bristol Live xəbər verir ki, məlumatlar 2022-2023-cü illərdə 35 hadisənin 2023-2024-cü illərdə 76 hadisəyə yüksəldiyini və "İrqçiliyə və Bərabərsizliyə Qarşı Dayan" (SARI) nifrət cinayətlərinə yardım təşkilatının dəstəklədiyi şəxslərin üçdə birindən çoxunun artıq müsəlmanlardan ibarət olduğunu göstərir.
SARI-nin baş direktoru Aleks Reyks bu narahatedici tendensiyanı belə izah edib: "Southport şəhərindəki faciəvi qətllərdən bəri müsəlmanlara qarşı nifrətə dair çoxlu kədərli hesabatlar alırıq. Bunlar arasında müsəlman qadınların baş örtüklərinin açılması və lağa qoyulması, uşaqların irqçi təhqirlərə məruz qalması və təhdid edilməsi, insanların fiziki hücuma məruz qalması, hətta üzlərinə yumruq vurulması və bəzilərinin ciddi şəkildə xəsarət alması halları yer alır."
Reyks, İslamofobiyanı körükləyən yanlış məlumatlar və önyarğıların rolunu vurğulayıb. O, bəzi media və siyasət dairələrinin İslamı bir təhlükə kimi göstərərək qorxu yaratdığını və bu cür ritorikanın nifrət üçün zəmin hazırladığını qeyd edib.
İngiltərə Daxili İşlər Nazirliyinin statistikaları, Birləşmiş Krallıqda İslamofobik hadisələrin 13% artdığını göstərir. Bu artım qismən İsrailin ötən ilin oktyabrında Qəzzəyə qarşı başlatdığı müharibədən sonra yaranan gərginliklə əlaqələndirilir.
Müsəlmanlara qarşı hadisələri izləyən Britaniya təşkilatı Tell MAMA qaçqınların yaşadığı yerlərə edilən hücumlar da daxil olmaqla nifrət cinayətlərində artım olduğunu bildirir.
Avon və Somerset Polis rəisi Karen Korrigan nifrət cinayətlərinin çox az bildirildiyini qeyd edərək son bir neçə ildə şikayətlərin artmasını müsbət qiymətləndirib və daha çox insanın polisə güvənərək şikayət etdiyini bildirib.
Baş polis rəisi hər bir nifrət cinayətinin qurban və cəmiyyət üzərində təsiri olduğunu vurğulayıb və görülən işlərə məktəblərlə əməkdaşlıq, cəmiyyət liderləri ilə birbaşa əlaqə və yeni yaradılmış Müsəlman Polis Dərnəyi vasitəsilə əməkdaşlara dəstək göstərməyi daxil edib.
Keçən ay İngiltərə Müsəlman Şurası tərəfindən Milli İslamofobiya Strategiyası Toplantısı təşkil olunub. Bu tədbirdə ölkə üzrə müsəlman icma fəalları, təşkilatlar, yerli nümayəndələr və akademiklər İngiltərədə artan İslamofobiyaya qarşı ortaq cavabları müzakirə etmək üçün bir araya gəliblər.
Bu toplantı, Daxili İşlər Nazirliyinin 2024-cü ilin mart ayında dini nifrətdən qaynaqlanan cinayətlərin təxminən 40%-nin müsəlmanlara qarşı törədildiyini göstərən statistikalarının açıqlanmasından sonra baş tutub.
4253079
