İspaniya dövləti müsəlmanlara qarşı nifrət çağırışlarını yaxından izləyir
İQNA-nın “Express” xəbər saytına istinadən verdiyi məlumata görə, hökumət Mursiya əyalətinin “Xumiyə” bələdiyyəsində ictimai məkanların İslam dini mərasimləri üçün istifadəsinin məhdudlaşdırılması barədə mübahisəli razılıqdan sonra müsəlmanlara qarşı nifrət ifadələrini yaxından nəzarətdə saxlayacaq.
Bu addım, xüsusilə keçən ay “Tore Paçeko” şəhərində baş vermiş irqçi hadisələrdən sonra anti-müsəlman ritorikanın artması ilə bağlı rəsmi narahatlıqlar fonunda atılıb.
İnteqrasiya, Sosial Təhlükəsizlik və Miqrasiya Nazirliyi bildirir ki, irqçilik və yad düşmənçiliyə qarşı milli müşahidə qrupu (Oberaxe) insanların azadlıq və ləyaqətini təhdid edən ritorikanı, xüsusilə sosial mediada sürətlə izləyib təhrikedici məzmunu platformalarla birgə analiz edərək siləcək.
28 iyulda təsdiqlənən razılıq “Voks” partiyasının İslam mərasimlərinin qadağan olunmasını tələb edən təklifinə əsaslanır. Təklif bələdiyyəni “İspaniyanın ənənəvi dini kimliyini və dəyərlərini qoruyan təşəbbüsləri təşviq etməyə” çağırır.
“Xumiyə” şərab istehsalı ilə məşhur, təxminən 280 min əhalisi olan bir şəhərdir. Onun təxminən 10 faizi müsəlmanlardan ibarətdir və burada 70-dən çox millətə mənsub çoxmillətli icma yaşayır.
İspaniya dövləti yerli siyasətdəki “radikallaşma”nı pisləyərək, razılığın İspaniya Konstitusiyasının, xüsusilə də dini azadlıq prinsiplərinin pozulması olduğunu xəbərdar edib. Belə addımların ictimai sülhü təhlükə altına ala biləcəyi vurğulanır.
Populist radikalizm dalğalarının artması və sağçı ekstremizmin bəzi bələdiyyələrdə təsirinin genişlənməsi fonunda İspaniya dini azadlıqların həyata keçirilməsi ilə bağlı yeni çətinliklərlə üzləşir. Bu, ölkənin mədəni müxtəlifliyi qorumaq və bütün vətəndaşların əsas hüquqlarını təmin etmək baxımından önəmli sınaqdır.
4299080
