İsveçdə Məscid Ətrafında Atışma: 1 Ölü, 1 Yaralı

İQNA – İsveçin Orebro şəhərində cümə namazından sonra məscidin qarşısında baş verən atışma nəticəsində 25 yaşlı bir kişi ölüb, digər gənc yaralanıb. Hadisə yerinə təcili yardım və polis cəlb olunub, sakinlər hadisə yerindən uzaq durmağa çağırılıb.

İQNA-nın xəbərinə görə, iOrebro polisi baş inspektoru Roberto Eid Forest bildirib ki, ən azı bir şübhəli hadisə yerindən çıxarkən müşahidə edilib. Polis hadisəni qəsdli qətl, qətl cəhdi və silah qanun pozuntusu kimi araşdırır.

İsveçin TT xəbər agentliyinin məlumatına görə, polis hadisənin yerli qruplar arası münaqişə ilə bağlı ola biləcəyini istisna etmir. Yerli TV4 kanalı isə Orebroda iki rəqib qrup arasında son vaxtlar gərginliyin artdığını xəbər verib.

İbadət yerləri yaxınlığında zorakılıq hallarının artması Avropada islamofobiyanın yüksəlməsi ilə bağlı narahatlıq doğurur. Müsəlman icmaları son illərdə qıcıqlandırıcı sözlərdən tutmuş fiziki hücumlara qədər nifrət cinayətlərində artım olduğunu bildirirlər.

Son illərdə İsveçdə sağçı qruplar tərəfindən Qurani-Kərimin yandırılması aksiyaları təşkil edilib ki, bu da müsəlman sakinlər arasında qorxu və etimadsızlıq mühiti yaradıb və məscidlərin təhlükəsizliyinə təsir göstərib.
3494262