Avropa İttifaqı Livanda dini simvolların qorunmasını tələb etdi

İQNA – Avropa İttifaqının Xarici İşlər üzrə sözçüsü Ənvər əl-Ünuni, sionist rejimin bir hərbçisinin cənubi Livandakı xristian əhalinin yaşadığı ərazidə Məryəm (ə) heykəlinə təhqir etməsinə reaksiya olaraq, dini simvolların qorunmasının və din azadlığına hörmət edilməsinin vacibliyini vurğuladı.

“İQNA”-nın Fələstin İnformasiya Mərkəzinə istinadən verdiyi xəbərə görə, əl-Ünuni Anadolu Agentliyinə müsahibəsində bildirib ki, Avropa İttifaqı Livanla sionist rejim arasında atəşkəsin həssas olmasına görə bütün tərəfləri təmkinli olmağa çağırmaqda davam edir.

O, davamlı razılaşmanın əldə edilməsi üçün danışıqların davam etməsinə işarə edərək dedi: "Dini simvolların qorunmasının və din azadlığının təmin edilməsinin vacibliyini vurğulayırıq."

Bu yaxınlarda sionist hərbçinin Məryəm heykəlinin ağzına siqaret qoymasını göstərən görüntülər yayıldı; bu hərəkət cənubi Livandakı xristianlar arasında geniş qəzəbə səbəb oldu.

Bundan əvvəl də 19 apreldə sionist bir hərbçinin Dəbl qəsəbəsində balta ilə Məsih (ə) heykəlini dağıtdığını göstərən videolar yayılmışdı; bu hərəkət geniş dini və siyasi etirazlarla qarşılanmışdı.

4351403