BMT‑də Nəkbənin 78-ci ildönümü anıldı
“İQNA”-nın “Anadolu”-ya istinadən verdiyi xəbərə görə, BMT Baş Assambleyasının prezidenti Annalena Baerbock Nəkbə günü münasibətilə keçirilən mərasimdə çıxış edərək bildirib ki, BMT 78 ildir Fələstin məsələsinə cavabdehdir və BMT Nizamnaməsi, beynəlxalq hüquq və BMT qətnamələrinə uyğun olaraq ədalətli və davamlı həll yoluna nail olmaq üçün səylərini davam etdirməlidir.
Baerbock üzv dövlətləri Nyu-York Bəyannaməsinə yenidən sadiqlik nümayiş etdirməyə və onu BMT-də iki dövlətli həll yoluna çatmaq üçün təsdiqləməyə çağırıb.
Baş Assambleya prezidenti həmçinin Qəzzadakı hazırkı vəziyyətə diqqət çəkib; burada elan olunan “atəşkəs”dən bəri, çoxlu sayda uşaq da daxil olmaqla, təxminən 800 fələstinli öldürülüb. Humanitar vəziyyət fəlakət həddindədir, yardıma çıxış məhduddur və tələbat isə çox yüksəkdir.
O əlavə edib ki, Hörmüz boğazındakı gərginlik xəbərlərin başlıqlarını zəbt etsə də, Qəzzadakı bu ağırlaşan vəziyyət bizi 80 il əvvəl BMT Nizamnaməsində müəyyən etdiyimiz məqsədə – gələcək nəsilləri müharibə fəlakətlərindən xilas etməyə – daha ciddi şəkildə bağlamalıdır.
Digər tərəfdən, BMT-nin Siyasi Məsələlər İdarəsində Yaxın Şərq, Avropa, Amerika, Asiya və Sakit Okean üzrə baş katib müavini Xalid Xiyari bildirib ki, Nəkbə təkcə tarixi bir hadisə deyil, dünyanın ən uzun sürən qaçqın böhranıdır və hələ də davam edir.
O, həll yolu olmadan bu böhranın davam etməsini ağrılı adlandırıb və qeyd edib ki, bu böhran fələstinlilərin kimliyini və həyatını formalaşdırır, onların ədalət və öz müqəddəratını təyinetmə uğrunda yorulmaz mübarizəsini çətinləşdirir.
Xiyari vurğulayıb ki, Nəkbənin anılması BMT-yə yalnız xatırlatma deyil, həm də fəaliyyət göstərmək kimi məsuliyyətlər yükləyir.
O, beynəlxalq ictimaiyyətin kollektiv öhdəliklərinə işarə edərək bildirib ki, bu öhdəliklər qeyri-qanuni fəaliyyətlərin dayandırılması, mülki şəxslərin qorunması, Fələstin hökumətinə dəstək və danışıqlara əsaslanan iki dövlətli həll yoluna aparan etibarlı siyasi prosesin bərpasını əhatə edir.
Fələstin Muxtariyyətinin BMT-dəki nümayəndəsi Riyad Mənsur, Mahmud Abbasın çıxışını oxuyub. Çıxışda fələstinlilərin öz torpaqlarında azad və ləyaqətli şəkildə yaşamaq hüququ, milli varlığı və milli hüquqları vurğulanıb.
O əlavə edib ki, fələstin xalqının hüququ dünya ölkələrinin və beynəlxalq sistemin üzərindədir; onlar fələstinlilərə azadlıq, müstəqillik və digər xalqlar kimi təhlükəsizlik və sülh içində yaşamaq imkanı əldə etmələrinə yardım etməlidirlər.
Mərasimdə həmçinin şəhid uşaq Hind Rəcəbin anası Vissam Həmədənın video-müraciəti səsləndirilib. O, 2024-cü ilin yanvar ayının sonunda İsrail işğalçıları tərəfindən qətlə yetirilən azyaşlı qızının həyat yolunu xatırladıb. Hind, Qəzzanın Tel əl-Həva məhəlləsində qohumlarının avtomobilində olarkən, işğalçı tanklar tərəfindən mühasirəyə alınmış və atəşə tutulmuşdu.
4352501
