"İQNA"-nın "Əl-Cəzirə"-yə istinadən verdiyi məlumata görə, bosniyalı tədqiqatçı və tərcüməçi Əsəd Durakoviçin Quran tərcüməsinin nəşrindən 20 ildən çox vaxt keçir.
"Quranı-Kərim bosniya dilində tərcümə ilə" (Kuran s prijevodom) kitabı 2004-cü ildə Sarayevoda nəşr olunub; bir çox mütəxəssis onu bu dildəki ən yaxşı tərcümə hesab edir. O, 2025-ci ilin sonlarında bu əsərin ikinci nəşrini çap etdirib. Bu, iki onilliyini tamamlamağa sərf etdiyi və İstanbuldakı Ali Araşdırmalar Mərkəzinin nəzarəti altında çap olunan bir layihədir.
1948-ci il təvəllüdlü Durakoviç ərəb və islamşünaslıq sahəsində tanınmış tədqiqatçılardandır.
"Kuran s prijevodom" bosniya dilində Quranın ən yeni tərcümələrindən biridir. Durakoviç iddia edir ki, Quranın əvvəlki bosniya dili tərcümələrindən fərqli olaraq, o, öz tərcüməsində Quranın bəlağət (ritorik) tərəfini əks etdirib.
Durakoviçin bu məqsədə çatmaq üçün seçdiyi bədii yanaşma bosniya dilindəki digər Quran tərcümələri ilə müqayisədə tamamilə yenilikçi görünür. İlk növbədə, o, Məkkə surələrinin poetik tərcüməsini edərək, mənanı qafiyə ilə birləşdirib.
Bunun əksinə olaraq, Mədinə surələrinin tərcüməsi isə üslub xüsusiyyətlərinə görə daha uzun cümlələrlə müşayiət olunur və ümumilikdə "dinamik ekvivalentlik" nəzəriyyəsinə uyğundur. Bu tərcümənin xüsusi güclü tərəfi sözbəsöz tərcümədən qaçılması və açar anlayışların məharətlə izah edilməsidir ki, bu da onun üslubunu Bosniya və qonşu ölkələrdəki geniş auditoriya üçün anlaşıqlı və istifadəyə yararlı edir.
"Əl-Cəzirə" kanalı bu tərcümə və Durakoviçin digər araşdırmaları haqqında onunla müsahibə aparıb. Müsahibənin xülasəsi aşağıdakı kimidir:
"Mən hesab edirəm ki, günümüzdə möminlərin qəlbində Allah qorxusunu deyil, Allah sevgisini yetişdirməyə ehtiyac var. Çünki sevgi müsbət əməllərə sövq edən bir stimul və təşviqdir, qorxu isə neqativliyə və durğunluğa gətirib çıxarır. Bu mənim şəxsi baxışımdır və onu heç kimə təlqin etmirəm".
Durakoviç öz tərcüməsini digərlərindən fərqləndirən cəhətlər haqqında deyib: "Mənim tərcüməmdən əvvəl bosniya dilində Quranın yeddi tam tərcüməsi var idi. Onların hamısı Quran mətninin bənzərsiz üslubuna və fəsahətinə əhəmiyyət vermədən yalnız mənanı çatdırmağa köklənmişdi. Mənim məqsədim bütün insani gücümlə bu gözəlliyin heç olmasa bir hissəsini çatdırmaq idi, halbuki heç bir tərcümənin bu hədəfə tam nail ola bilməyəcəyini dərk edirdim. Bununla belə, istəyirdim ki, mətnin bu daxili xüsusiyyətlərini ön plana çıxarım".
"Quranı-Kərim "Allahın kəlamı"dır, tərcümə isə Allahın kəlamının kamilliyinə yaxınlaşmağa çalışan, lakin tam müvəffəq ola bilməyən "bəşər kəlamı"dır".
4332553
