د کشمیر یوې کاڼې نجلۍ ټول قرآن کریم پخپل لاس سره ولیکه
ایکنانیوز د مسلم میرر له قوله راپور راکړی، په جمو او کشمیر کې د ډوډا په بهالسا سیمې کې، چې یوه غرنۍ او ارامه سیمه ده او ژوند پکې له طبیعت سره په سوله ايز توګه جریان لري، د ایمان او استقامت یوه په زړه پورې کیسه راڅرګنده شوې ده؛ دا کیسه د سیمې په زړونو کې ځای لري.
د لسم ټولګي ۱۶ کلنه زدهکوونکې مهوش عارف،، چې د باتارا ګاوالو له لیرې پرتې کلیوالي سیمې څخه ده، یوې غیرعادي معنوي لاسته راوړنې ته رسېدلې ده: هغې د قرآن کریم ټول متن په لاس لیکلی دی. دا لاسته راوړنه ځکه نوره هم الهامبخښونکې ده چې هغه له زیږون راهیسې کاڼه او ګونګې ده.
په یوې نړۍ کې چې په شور او غوغا کې ډوبه ده، د مهوش خاموش عبادتي سفر هر څه بیانوي. هغې په ۹ میاشتو کې، پرته له کوم رسمي راهنما یا مرستې، د قرآن کریم ټول متن له پیله تر پای پورې ، کرښه په کرښه، په خپل کور کې په دقت سره ولیکه. د هغې هوډ، چې د ژور معنوي هدف له امله رامینځته شوی و، نه یوازې د هغې کورنۍ، بلکې ټوله سیمه ئې حیرانه کړه.
د هغې مور او پلار ، چې له احساساتو ډک او ویاړلي وو، تشریح کړه چې هغې څنګه ځان په دغې الهي دندې کې ډوب کړ او له مرستې اخیستنې ئې انکار وکړ. دا خپلواکه کړنه، په تیره بیا د یوې پرَکوَټې نجلۍ له خوا، د سیمې د ښوونکو او روزونکو له نظره بېساري بلل شوې ده. په ګاندو کې د نجونو حکومتي لیسې، چې هغه پکې زدهکړې کوي، د هغې ملاتړ کړی دی. د دغه ښوونځي مدیر اجیت سینګ خپله ژوره ستاینه داسې څرګنده کړه: "مهوش شاید خبرې ونه کړای شي، خو د هغې کړنې له کلمو لوړ غږ لري. هغه نه یوازې د زدهکوونکو، بلکې زمونږ د ټولې ټولنې لپاره یوه بېلګه ده."
د بهالسا کلي اوسیدونکي د دغه عمل په دلیل ویاړ او خوښي احساسوي. مشران، ګاونډیان او ښوونکي هغه د ناپییلې تمرکز د سمبول په توګه ګوري ،په داسې نړۍ کې چې ډېری وخت سطحي شیان ستائي.
مهوش عارف پرته له کومې خبرې، یو میراث ئې نه یوازې په کاغذ، بلکې د هر هغه چا په زړونو کې حِک کړی دی چې د هغې له سرښیندنې او زیار څخه خبر شوی دی. د هغې کیسه د ایمان، زړورتیا او د یو پاک روح د خاموش قوت کیسه ده چې په یوه سپیڅلې ماموریت کې ده.
https://iqna.ir/fa/news/4287331
