د الجزایر تاریخي قرآن افریقائي علماوو ته ډالۍ شو

ایکنا - د الجزایر د دیني چارو او اوقافو وزیر د «رودوسي» تاریخي قرآن یوه نسخه، په دې هېواد کې د دیني ډیپلوماسۍ په سمینار کې ګډون کوونکو افریقايي علماوو ته ډالۍ کړه.

 ایکنانیوز د الاتحاد له قوله لیکلي دي، د الجزایر د دیني چارو او اوقافو وزیر، یوسف بلمهدی، د «د افریقا په ساحلي سیمو کې دیني ډیپلوماسي» تر عنوان لاندې سمینار کې له ګډون کوونکو علماوو او مفکرینو سره د لیدنې پر مهال، د دې هېواد د ولسمشر عبدالمجید تبون تر څارنې لاندې چاپ شوې د «رودوسي» تاریخي قرآن یوه نسخه هغوی ته ډالۍ کړه.

د الجزایر د دیني چارو وزارت په یوې اعلامیې کې ویلي چې دا لیدنه وروسته له دې ترسره شوه چې افریقايي علماوو د «د افریقا په ساحلي سیمو کې دیني ډیپلوماسي؛ فرصتونه او ننګونې» په نوم سمینار کې ګډون کړی و.

دا سمینار د افریقا د ساحلي هېوادونو د علماوو، مبلغینو او د جماعت د امامانو د ټولنې له خوا تنظیم شوی و او د الجزایر د اسلامي چارو عالي شورا پکې همکاري لرله.

په دې علمي غونډه کې د افریقا د ۱۱ هېوادونو استازو ګډون کړی و، او پکې د امنیت او ثبات په پیاوړتیا کې د دیني ډیپلوماسۍ ارزښت، د افریقا د کړکېچونو په حل کې د الجزایر رول، او د دې وچې د شتمنیو پر وړاندې د بهرنیانو د طمعې پر وړاندې د مقابلې لارې چارې وڅېړل شوې.

د افریقا د ساحلي هېوادونو د علماوو ټولنې کې د موریتانیا استازي، موسی صار،د تاوتریخوالي او افراطیت پر وړاندې د مبارزې لپاره د دیني ډیپلوماسۍ پر فعالولو ټینګار وکړ او ویې ویل چې دا سمینار د عامه پوهاوي په لوړولو کې مهم رول لري.

هغه زیاته کړه چې دودیزې لارې نورې د افراطیت او ترهګرۍ پر وړاندې بسنه نه کوي، بلکې د دې کړکېچ د ریښو د حل لپاره یو منظم دیني چوکاټ اړین دی.

 «ثعالبیه» یا «رودوسي» قرآن، یو الجزایري خطي قرآن دی چې د نافع له روایت څخه د ورش په قرائت او په مغربي (مراکشي) خط لیکل شوی دی. د دې قرآن چاپ په ۱۳۵۰ هجري قمري کال (۱۹۳۱ میلادي) کې پیل شو.

د ثعالبیه چاپ‌خونې په ۱۳۵۰ هجري قمري کال، چې له ۱۹۳۱ میلادي سره سمون خوري، په الجزایر کې د قرآن کریم لومړنۍ چاپي نسخه خپره کړه. دا نسخه د مرحوم الجزایري خطاط محمد شرادي، چې په محمد السفتي یا محمد السفاتي مشهور و، په مغربي یا مراکشي خط او د ورش له روایت سره لیکل شوې ده.

https://iqna.ir/fa/news/4330412