د اسلامي علومو د زدهکړې مرکز او ددینونو ترمینځ د ګډ ژوند پل
د ایکنا د راپور له مخې، چې د باعلوي جومات له رسمي پاڼې څخه نقل شوی راغلي دي، د سینګاپور په زړه کې، هغه ځای چې بېلابېل دینونه، کلتورونه او قومونه د نړۍ په یوه له تر ټولو پرمختللو او منظم هېوادونو کې د یو بل ترڅنګ ژوند کوي، مذهبي بنسټونه د ګډ ژوند او ټولنیز تعامل د ارزښتونو په پیاوړتیا کې مهم شریکان ګڼل کېږي. دغه بنسټونه د داسې متمدن انځور د وړاندې کولو مسؤلیت پر غاړه لري چې د هغوی هویت او پیغام په یوه متنوع او پرانیستي چاپېریال کې څرګندوي.
په همدې پرمختللي اسیائي چاپېریال کې، تاریخي باعلوي جومات لا هم خپل هغه رسالت ته دوام ورکوي چې یوازې تر عبادت پورې محدود نه دی. دغه جومات په داسې اسلامي بنسټ بدل شوی چې خوندیتوب او ګډ ژوند سره یوځای کوي، اسلامي میراث ساتي، او د ټولنې له بېلابېلو پرګنو سره د پوهې او اړیکو پلونه جوړوي. په دې توګه، دا جومات په سینګاپور کې د اسلام د متمدنې څېرې یوه غوره بېلګه وړاندې کوي
تاریخي باعلوي جومات په سینګاپور کې خپل ځای د هېواد د تر ټولو مهمو اسلامي تاریخي آثارو په توګه لا پیاوړی کړی دی. په وروستیو میاشتو کې دغه جومات د سینګاپور دننه او له بهر څخه د ګڼو رسمي، ډیپلوماتیکو، علمي او ټولنیزو پلاوو کوربهتوب کړی، چې دا د دغه جومات دینی او فرهنګي اهمیت او د خبرو اترو او ټولنیز تعامل په پراختیا کې د هغه د مخ پر زیاتېدونکي رول څرګندونه کوي.
دغه جومات د برونای د دفاع وزیر، د ملایشیا د سلنګور ایالت اعلی وزیر، د ترکیې د قونیې ښاروال، او همدارنګه د سینګاپور د حکومتي چارواکو، سفیرانو او ډیپلوماتانو په ګډون د ګڼو رسمي پلاوو هرکلی کړی دی. دغو مېلمنو د جومات له تاریخ، د بنسټ اېښودونکو له رسالت او د ټولنې د خدمت او اسلامي میراث د ساتنې له هڅو سره آشنائي ترلاسه کړې ده.
دغه جومات د دینونو ترمینځ د خبرو اترو د نوښتونو او د مدني ټولنې د تنظیمونو د استازو کوربهتوب هم کړی دی.
باعلوي جومات یوازې د عبادت ځای نه دی، بلکې د تاریخي لاسوندونو، نادرو قرآنونو او تاریخي آثارو یوه ارزښتناکه ټولګه هم لري، چې په سینګاپور کې د مسلمانانو د تاریخ یوه برخه مستندوي.
دغه جومات د داسې اسلامي بنسټ بېلګه دی چې خپل اسلامي هویت ساتي او په عین حال کې له خپل ملي او نړیوال چاپېریال سره اغېزشیندونکی تعامل لري، او د سویل ختیځې اسیا په یوه له تر ټولو متنوع او پرمختللو ټولنو کې د اسلام د متمدنې څېرې په معرفي کولو کې مهم رول لوبوي.
https://iqna.ir/fa/news/4365547
