دنیا بھر میں نواسہ رسول (ص) کا سوگ ، ایران،پاکستان سمیت مختلف ممالک میں یوم عاشور آج
ایکنا نیوز- ایران ریڈیو کے مطابق آج ایران، ہندوستان اور پاکستان سمیت دنیا کے مختلف ممالک میں بھی یوم عاشور منایا جارہا ہے ۔
ہمارے نمائندے کی رپورٹ کے مطابق آج پورے ایران میں نواسہ رسول حضرت امام حسین علیہ السلام اور آپ کے بہتر ساتھیوں کا غم منایا جارہا ہے اور ملک کا چپہ چپہ سوگوار ہے۔
یوں تو پہلی محرم سے ہی پورے ایران میں مساجد اور عزاخانوں میں مظلوم کربلاءکی صف ماتم بچھی ہوئی ہے لیکن مجلس و ماتم کاسلسلہ نویں محرم سے اپنے عروج پر ہے۔ تمام چھوٹے بڑے عزاخانوں میں علماء کرام و ذاکرین فلسفہ شہادت امام حسین بیان کرنے کے ساتھ ہی اہلبیت رسول پر ڈھائےجانے والے مصائب بیان کررہے ہیں جبکہ ماتمی انجمنیں نوحہ خوانی اور سینہ زنی کرکے امام مظلوم کاغم منارہی ہیں۔
ہندوستان اور پاکستان سے ملنے والی رپورٹوں میں بھی بتایاگیا ہے کہ عشرہ محرم کی مناسبت سے ہونے والی مجالس اور جلوس ہائے عزا کے لئے سخت سیکورٹی انتظامات کئے گئے ہیں اورکسی بھی طرح کے ناخوشگوار واقعے سے نمٹنے کےلئے سیکورٹی اہلکاروں کو الرٹ کردیاگیا ہے۔ پاکستان سے ملنے والی رپورٹوں کے مطابق لاہور میں دس محرم الحرام کا مرکزی جلوس نثار حویلی سے برآمد ہوکر اپنے مقررہ راستوں پر رواں دواں ہے اور مغرب کے وقت کربلا گامے شاہ پہنچ کر اختتام پذیرہوگا۔ جلوس کی حفاظت کے لئے سیکورٹی کے سخت انتظامات کئے گئے ہیں۔تمام بڑے شہروں میں ڈبل سواری پر پابندی عائد ہے جبکہ ملک کے حساس علاقوں میں موبائل فون سروس بھی بند رہےگی۔
