پورے ملک میں مدارس کی رجسٹریشن پر تیزی سے کام جاری ہے، سردار یوسف
ایکنانیوز- اسلام ٹائمز۔ وفاقی وزیر برائے مذہبی امور سردار یوسف نے کہا ہے کہ مدارس کی رجسٹریشن کے حوالہ سے تمام مکاتب فکر کے علماء کے درمیان اتفاق رائے موجود ہے۔ یہ بات انہوں نے واہ کینٹ، ٹیکسلا میں ایک مدرسہ کے دورہ کے موقع پر صحافیوں سے بات کرتے ہوئے کہی۔ وزیر مذہبی امور کا کہنا تھا کہ مدارس کی رجسٹریشن وزارت داخلہ اور صوبائی حکومتوں کے تعاون سے ہو گی۔ پورے ملک میں مدارس کی رجسٹریشن اور مدرسہ ریفامز کے حوالہ سے تیزی سے کام جاری ہے۔ انہوں نے مزید کہا کہ وزارت مذہبی امور تعلیمی ماہرین کی مدد سے مدارس کے لئے کورس تیار کر رہے ہیں، وہ طلبا کی دینی و دنیوی دونوں تعلیموں میں فائدہ مند ہو گا۔ انہوں نے کہا کہ دہشت گردوں کے خلاف جاری آپریشن ضرب عضب نواز حکومت کی بڑی کامیابیوں میں سے ہے۔ سردار یوسف کا کہنا تھا کہ نظام صلوۃ کو جلد پورے ملک میں نافذ کیا جائے گا۔
