قرآن میں عیسی مسیح کی زندگی

ایکنا: حضرت عیسی کی زندگی میں اہم ترین انکی ولادت ہے اور قرآن و مقدس کتاب میں اس بارے داستان مختلف ہے۔

عیسی علیہ السلام اولوالعزم اور صاحب شریعت انبیاء میں سے ہیں اور ان کی آسمانی کتاب کو انجیل کہا جاتا ہے۔ وہ آخری نبی تھے جو پیغمبر اسلام سے پہلے مبعوث ہوئے اور ان کا شمار ان بشارت دینے والوں میں ہوتا ہے جنہوں نے نبی آخر الزمان ﷺ کے ظہور کی خوشخبری دی۔

قرآن مجید میں ان کا نام 25 مرتبہ ذکر ہوا ہے۔ قرآن میں حضرت عیسی کے زندگی کے مختلف واقعات بیان کیے گئے ہیں، جن میں سے ایک اہم واقعہ ان کی ولادت ہے۔ قرآن میں حضرت عیسی کی ولادت کے واقعے کی تفصیلات عیسائیوں کی مقدس کتاب میں درج تفصیلات سے مختلف ہیں۔ ذیل میں قرآن مجید میں حضرت عیسی علیہ السلام کی ولادت کا ذکر پیش کیا گیا ہے:

قرآن مجید میں اللہ تعالیٰ حضرت عیسی کو حضرت مریم کے بیٹے کے طور پر متعارف کراتا ہے، جو عمران کی بیٹی تھیں۔ مریم، حنا اور عمران کی بیٹی تھیں اور بچپن سے ہی عبادت کے لیے معبد میں سپرد کردی گئیں، جہاں حضرت زکریا علیہ السلام کی نگرانی میں ان کی پرورش ہوئی۔ مریم کو اسلام میں تمام عورتوں پر برتری دی گئی ہے۔ قرآن میں حضرت مریم کے بیٹے کو حضرت عیسی کہا گیا ہے، جو بیت لحم میں پیدا ہوئے اور ان کی ولادت ایک خاص اور منفرد واقعہ تھی۔

سورہ آل عمران کی آیت 45 کے مطابق، حضرت جبرائیل علیہ السلام اللہ کے حکم سے مریم کے پاس آئے اور انہیں یہ خوشخبری دی کہ اللہ انہیں ایک بیٹا عطا کرے گا، جس کا نام عیسی ہوگا، جو دنیا اور آخرت میں عظیم مقام رکھنے والے اور اللہ کے مقربین میں سے ہوگا۔ مریم نے حیرانی سے کہا، "«قَالَتْ رَبِّ أَنَّى يَكُونُ لِي وَلَدٌ وَلَمْ يَمْسَسْنِي بَشَرٌ قَالَ كَذَلِكِ اللَّهُ يَخْلُقُ مَا يَشَاءُ إِذَا قَضَى أَمْرًا فَإِنَّمَا يَقُولُ لَهُ كُنْ فَيَكُونُ»(آل عمران/47)

جب مریم نے محسوس کیا کہ ولادت کا وقت قریب ہے تو وہ ایک دور مقام پر چلی گئیں۔ وہاں انہیں دردِ زہ ہوا۔ اس وقت، جب وہ غمگین اور پریشان تھیں، اللہ نے انہیں تسلی دی اور فرمایا«فَنَادَاهَا مِن تَحْتِهَا أَلَّا تَحْزَنِي قَدْ جَعَلَ رَبُّكِ تَحْتَكِ سَرِيًّا*وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا»سورہ مریم: 24-25)

زچگی کے بعد، مریم اپنے بیٹے عیسی کو لے کر قوم کے پاس آئیں۔ لوگوں نے مریم کو دیکھ کر حیرانی کا اظہار کیا اور کہا«يَا أُخْتَ هَارُونَ مَا كَانَ أَبُوكِ امْرَأَ سَوْءٍ وَمَا كَانَتْ أُمُّكِ بَغِيًّا»(مریم/28) مریم نے اللہ کے حکم پر خاموشی اختیار کی اور عیسی کی طرف اشارہ کیا۔ تب حضرت عیسی نے گہوارے میں کلام کیا اور کہا: «قَالَ إِنِّي عَبْدُ اللَّهِ آتَانِيَ الْكِتَابَ وَجَعَلَنِي نَبِيًّا*وَجَعَلَنِي مُبَارَكًا أَيْنَ مَا كُنتُ وَأَوْصَانِي بِالصَّلَاةِ وَالزَّكَاةِ مَا دُمْتُ حَيًّا*وَبَرًّا بِوَالِدَتِي وَلَمْ يَجْعَلْنِي جَبَّارًا شَقِيًّا*وَالسَّلَامُ عَلَيَّ يَوْمَ وُلِدتُّ وَيَوْمَ أَمُوتُ وَيَوْمَ أُبْعَثُ حَيًّا»(مریم/30-33)

قرآن مجید نے حضرت عیسی کی پیدائش کو سورہ آل عمران کی آیت 59 میں حضرت آدم کی پیدائش سے تشبیہ دی ہے، کیونکہ وہ بھی بغیر والد کے پیدا ہوئے تھے۔ قرآن کریم میں حضرت عیسی کی ولادت اللہ کی لامحدود قدرت کا مظہر اور انسانی تاریخ کا ایک عظیم معجزہ ہے۔