مصری قاری «مصطفی اسماعیل» کی سالگرہ+ تلاوت
ایکنا نیوز- نیوز چینل تواصل الإخبارية نے رپورٹ کیا ہے کہ مصر کی وزارتِ اوقاف نے شیخ مصطفیٰ اسماعیل کی ولادت کی سالگرہ منائی۔ وہ مصر کے مشہور قاری اور عصرِ حاضر میں قرآنی تلاوت کی ممتاز ترین شخصیات میں شمار ہوتے ہیں۔ انہوں نے تلاوتِ قرآن کا ایک منفرد مکتبِ فکر قائم کیا، جس میں پُراثر ادائیگی، دلنشین آواز اور قرآنی معانی کی بہتر ترجمانی کے لیے نغماتی آہنگوں کے جدت آمیز استعمال کو یکجا کیا گیا تھا۔
استاد مصطفیٰ اسماعیل 17 جون 1905ء کو مصر کے صوبہ غربیہ کے ضلع السنطہ کے گاؤں میت غزال میں پیدا ہوئے۔ وہ ایک مذہبی اور قرآنی ماحول میں پروان چڑھے۔ کم عمری میں قرآنِ کریم حفظ کیا اور بعد ازاں طنطا کے احمدی ادارے میں داخلہ لیا، جہاں انہوں نے ممتاز علماء اور قراء کی نگرانی میں قراتِ قرآن اور فنِ تجوید کی تعلیم حاصل کی۔
1944ء میں مصر کے سرکاری ریڈیو نے انہیں باضابطہ قاری مقرر کیا، جبکہ شاہ فاروق کے دورِ حکومت میں وہ شاہی محل کے قاری بھی منتخب ہوئے۔
ان کا قرآنی سفر کئی اہم سنگِ میلوں سے عبارت ہے۔ وہ برسوں تک جامعہ الازہر میں سورۂ کہف کی تلاوت کرتے رہے۔ ان کی تلاوتیں مصر کے ریڈیو سے نشر ہوتیں اور عالمِ اسلام کے مختلف خطوں تک پہنچتیں، جو بعد کی نسلوں کے قراء اور قرآن سے محبت رکھنے والوں کے لیے سرچشمۂ الہام بن گئیں۔
شیخ مصطفیٰ اسماعیل نے متعدد عرب، اسلامی اور دیگر ممالک کا دورہ کیا اور قرآنِ کریم کا پیغام دنیا کے مختلف براعظموں تک پہنچایا، جس کے اعتراف میں انہیں ’’دنیا کے لیے قرآن کے سفیر‘‘ کا خطاب دیا گیا۔ ان کی زندگی کا ایک تاریخی لمحہ 1977ء میں مسجد اقصیٰ میں قرآنِ کریم کی تلاوت تھا، جو اس وقت پیش آیا جب مصر کے صدر انور سادات نے بیت المقدس کا دورہ کیا۔
استاد مصطفیٰ اسماعیل کو قومی اور بین الاقوامی سطح پر متعدد اعزازات اور تمغے عطا کیے گئے، جن میں 1965ء کا ’’یومِ علم‘‘ تمغہ، لبنان کا ’’نشانِ سرو‘‘ اور دیگر کئی اعزازات شامل ہیں، جو انہیں کتابِ الٰہی کی خدمت کے اعتراف میں دیے گئے۔
استاد مصطفیٰ اسماعیل کو فنِ تلاوتِ قرآن میں ایک مستقل مکتبِ فکر کی حیثیت حاصل ہے۔
شیخ مصطفیٰ اسماعیل 26 دسمبر 1978ء کو ایک روحانی اور بابرکت زندگی گزارنے کے بعد اس دنیا سے رخصت ہوگئے۔ وہ اپنے پیچھے ایک عظیم اور لازوال قرآنی ورثہ چھوڑ گئے، جس کی بازگشت آج بھی دنیا بھر کے مسلمانوں کے دلوں میں سنائی دیتی ہے۔
ذیل میں استاد مصطفیٰ اسماعیل کی شاہکار تلاوتوں کے منتخب حصے سنے جا سکتے ہیں۔/
4359307
