غلط قرآنی نسخوں کو روکنے کے لیے ادارہ اوقاف کی کاوش
ایکنا نیوز- نیشن نیوز کے مطابق پنجاب اوقاف کے ڈائریکٹر جنرل احسان بھٹہ نے اعلان کیا ہے کہ قرآنِ کریم میں کسی بھی قسم کی لفظی یا معنوی تحریف اور طباعتی غلطیوں کے مکمل خاتمے کے لیے تمام دستیاب وسائل بروئے کار لائے جائیں گے۔
انہوں نے پنجاب قرآن بورڈ کے 59ویں اجلاس سے خطاب کرتے ہوئے کہا کہ مصححین کی پیشہ ورانہ صلاحیتوں میں اضافہ کرنے کے لیے فوری طور پر خصوصی تربیتی کورسز شروع کیے جائیں گے، جبکہ اس مقصد کے لیے جامع رہنما اصول بھی مرتب کیے جائیں گے۔
احسان بھٹہ نے صوبے بھر میں نگرانی کے نظام کو مزید فعال اور مؤثر بنانے کے لیے تفصیلی ہدایات جاری کرتے ہوئے کہا کہ قرآنِ کریم کے احترام اور اس کے مستند نسخوں کے تحفظ کو ہر صورت یقینی بنایا جائے گا۔ اس مقصد کے لیے ضلعی انتظامیہ اور اوقاف حکام کے درمیان قریبی تعاون کو فروغ دیا جائے گا۔
انہوں نے سوشل میڈیا پلیٹ فارمز کی مؤثر نگرانی پر بھی زور دیا تاکہ ایسی کسی بھی سرگرمی کا سدباب کیا جا سکے جو مختلف مذاہب اور مسالک کے درمیان ہم آہنگی اور رواداری کو نقصان پہنچا سکتی ہو۔
اس موقع پر پنجاب قرآن بورڈ کے چیئرمین حافظ زبیر حسن نے اپنے خطاب میں کہا کہ قرآنِ کریم کے متن کی حفاظت اور اس کی حقیقی روح کے مطابق اغلاط سے پاک طباعت کو یقینی بنانا ان کی سب سے اہم دینی اور قانونی ذمہ داری ہے۔
انہوں نے مزید کہا کہ بورڈ کے تمام اراکین اپنے فرائض انتہائی محنت، اخلاص اور لگن کے ساتھ انجام دے رہے ہیں۔
اجلاس کے دوران ڈائریکٹر جنرل اوقاف نے قرآن بورڈ کی کارکردگی اور انتظامی امور کو مزید مؤثر بنانے کے لیے مختلف قرآنی معاملات کی نگرانی کی خاطر خصوصی کمیٹیاں تشکیل دینے کی ہدایت بھی جاری کی۔ انہوں نے یہ بھی حکم دیا کہ آئندہ اجلاس میں تمام پیش رفت اور اقدامات پر مشتمل ایک جامع اور دستاویزی کارکردگی رپورٹ پیش کی جائے۔/
4357650
