Ərəbistan Beynəlxalq Quran Yarışlarına start verdi
İQNA-nın (Beynəlxalq Quran Xəbər Agentliyi) Ərəbistan çapı olan "Ukaz" qəzetinə istinadən verdiyi xəbərə görə Səudiyyə Ərəbistanı ölkənin İslami İşlər və Vəqflər Nazriliyinin təşəbbüsü ilə dünən, 15 noyabar 2014-cü il tarixində müqəddəs Məkkə şəhərində "Beytul-Həram"ın eyvanlarında Quran-Kərimin hifz, qiraət və təfsiri üzrə beynəlxalq yarışlarına start verdi. Yarışlar Noyabr ayının 19-dək davam edəcəkdir.
Yarışlar Quran-Kərimin təcvid və gözəl səslə oxunuş şərti ilə bütün Quran, 15 cüz və 5 cüz hifzi, peşəkar qiraət və tilavət və Quranın təfsiri ixtisasları üzrə keçiriləcəkdir. Quranın 5 cüzünün hifzi üzrə yarışlar əsasən qeyri-İslami ölkələrdən gələn yarışçılar arasında keçiriləcəkdir.
Qeyd edək ki, bu yarışlar tarixində ilk dəfədir ki, Məscidul-Həramın (Kəbə) eyvanlarında keçiriləcəkdir. Buna görə də bu yarışlar bu dəfə daha çox elmi dairələr və mətbuatın diqqət mərkəzindədir.
Quran yarışlarının 36-cı turunda 59 ölkədən 138 nəfər iştirak edir.
