İQNA-nın (Beynəlxalq Quran Xəbər Agentliyi) verdiyi xəbərə görə, Nigeriya şiələrinin rəhbəri Şeyx İbrahim Zəkzakinin qızı Süheylə Zəkzaki atasının vəziyyətinin ağır olduğunu və həkimlərə atasını müalicə etməyə icazə verilmədiyini açıqlayıb.
Livanın “alahednews” xəbər saytına müsahibə verən Süheylə Zəkzaki deyib ki, Nigeriya hökuməti bir neçə gün öncə bizə ata və anamızla telefonla danışmağa izn verdi. “Atam zindanda bir çox hüququndan məhrumdur. Xəstəliyi get-gedə ağırlaşır və Nigeriya hökuməti onu yavaş-yavaş öldürmək istəyir”.
Xatırladaq ki, 17 iyun 2019-cu ildə aparılan müayinə zamanı Şeyx İbrahim Zəkzaki və onun həyat yoldaşının səhhətində ciddi problemlər aşkarlanaraq bu barədə Kadun vilayəti ali məhkəməsinə ərizə göndərilib. Məhkəmə iki dəfə təxirə salınıb və növbəti məhkəmənin həftənin birinci günü keçiriləcəyi bildirilir.
Şeyx İbrahim Zəkzaki və onun həyat yoldaşı 2015-ci il dekabrın 13-də Nigeriya hərbçilərinin Zaria şəhərindəki hüseyniyyəyə basqını zamanı həbs olunublar.
Nigeriyanın müxtəlif bölgələrində Şeyx Zəkzakinin azadlığı tələbilə etiraz aksiyaları davam etdirilir.