Livan Hizbullahı Suriya münaqişəsində iştirakını inkar edib
“İQNA”-nın “Əl-Mənar”-a istinadən verdiyi məlumata görə, Livan Hizbullahı açıqlamasında hərəkatın Suriyadakı hadisələrdə iştirakı ilə bağlı iddiaları təkzib edib.
Bəyanatda deyilir: “Bəzi partiyalar Hizbullahın adını hadisələrlə əlaqələndirməyə çalışır və bu hərəkatın Suriyadakı hazırkı münaqişənin tərəflərindən biri olduğunu iddia edirlər”.
Bəyanatda həmçinin deyilir: “Hizbullah bu əsassız iddiaları açıq və qəti şəkildə rədd edir və medianı xəbərlərin verilməsində son dərəcə diqqətli olmağa və siyasi məqsədlərə və şübhəli xarici gündəmlərə xidmət edən çaşdırıcı məlumatlara uymamağa çağırır”.
Suriyanın sahilyanı ərazilərində toqquşmalar və iğtişaşlar ardıcıl ikinci gündür ki, davam edir, insan haqları təşkilatları isə yeni Dəməşq hökumətinin ünsürləri tərəfindən qadın və uşaq da daxil olmaqla onlarla mülki şəxsin edam edildiyi bir neçə yeni qanlı cinayət barədə məlumat verib.
Son günlər Suriyanın sahilyanı rayonları Əbu Məhəmməd əl-Culaninin başçılıq etdiyi yeni Dəməşq hökumətinin təhlükəsizlik qüvvələri ilə onun siyasətinin əleyhdarları arasında artan gərginliyin və qanlı toqquşmaların şahidi olub.
Suriyanın yeni hökumətinin siyasəti ələvilər arasında geniş qəzəb yaradıb və cümə axşamı Qardaha, Cəbla, Latakiya, Tartus, Homs və Masyaf şəhərlərində başlayan nümayişlərə səbəb olub.
Bu dinc nümayişə cavab olaraq Qolaniyə bağlı hərbi qüvvələr birbaşa etirazçılara atəş açıb. Homs şəhərində atışma bir nəfərin ölümü, üç nəfərin yaralanması ilə nəticələnib.
4270577
