Fələstin millisinin sabiq ulduzu Qəzzədə şəhid oldu

İQNA – Fələstin milli futbol komandasının sabiq oyunçusu Süleyman əl-Übeyd Qəzzə şəhərində sionist rejim hərbçilərinin açdığı atəş nəticəsində şəhid olub.

Ərəb mediasına istinadən İQNA xəbər verir ki, 41 yaşlı Süleyman əl-Übeyd bu gün, avqustun 7-də Qəzzədə israilli hərbçilər tərəfindən güllələnərək həyatını itirib.

Əl-Übeyd Fələstin futbol tarixinin ən tanınmış oyunçularından biri sayılırdı və karyerası ərzində bir neçə klubda çıxış etmişdi.

Qəzzədə şəhid olanların ümumi sayı 2023-cü ilin 7 oktyabrında “Əqsa tufanı” əməliyyatı başladıqdan bu günədək 61 min 158 nəfərə, yaralıların sayı isə 151 min 442 nəfərə çatıb.

Digər tərəfdən, sionist rejimin ABŞ-da yerləşən "Axios" saytındakı jurnalisti Barak Ravid bildirib ki, İsraillə HƏMAS arasında əsirlərin azad olunması üzrə aparılan danışıqlar dalana dirənib. O qeyd edib ki, baş nazir Benyamin Netanyahu Qəzzədə hərbi əməliyyatları genişləndirməyə çalışır.

Sionist rejimin müharibə kabineti bu məsələni müzakirə etmək üçün çərşənbə axşamı Qəzza zolağının, xüsusilə də bu bölgənin tamamilə işğalı planını gündəmə gətirsə də, nazirlər arasında razılıq əldə olunmayıb və qərarın verilməsi cümə axşamına təxirə salınıb.

Bütün bu cinayətlər fonunda dünya ictimaiyyətinin Fələstini rəsmən tanımaq istiqamətindəki səyləri daha da sürətlənib.

4298613