Mərakeşdə 6-cı Məhəmməd 19-cu beynəlxalq Quran mükafatı başlayıb
“İQNA”nın “24səa” saytına istinadla verdiyi xəbərə görə, Quranın hifzi, tilavəti, təcvidi və təfsiri üzrə 6-cı Məhəmməd 19-cu beynəlxalq mükafatı avqustun 26-sı, çərşənbə axşamı səhəri, Mərakeşin paytaxtı Rabatda start götürüb.
Mərakeşin vəqflər və islam işləri naziri Əhməd Təvfiq açılış mərasimindəki çıxışında mərakeşlilərin Qurana tarixi bağlılığını vurğulayıb.
O, Mərakeşdəki hazırkı səyləri – təqribən 500 min şagirdin, o cümlədən əhəmiyyətli faiz təşkil edən qadınların, Allahın kitabını oxumaq və onunla ünsiyyət qurmaq öhdəliyini – yüksək qiymətləndirib.
Əhməd ət Təvfiq əlavə edib: “Quranın hifzi və tilavəti yalnız Peyğəmbərin (s) məsuliyyəti deyil, həm də çətinliklərlə əhatə olunmuş dünyada varlığın dirəyi deməkdir.
O, mərakeşli alimlərin ayıqlığına və onların düzgün dəlillərlə və müdrik təhlillə möhkəmlənmiş Quran mesajını ötürmək üçün göstərdikləri davamlı səylərinə görə qürur hissi keçirdiyini bildirib.
Mərakeş Quran müsabiqəsinin açılış mərasimi mərakeşli qari Əbdülkərim əl-Bəqiullahın gözəl tilavəti və münsiflər heyətinin sədri doktor Əbdürrahim Nabəlsinin çıxışı ilə keçirilib.
Həmçinin, 6-cı Məhəmməd beynəlxalq Quran mükafatını təqdim edən video nümayiş olunub. Orada Mərakeşdə Quranın qorunması sahəsində qabaqcıl müəssisələr – 6-cı Məhəmməd Quran Tilavətləri İnstitutu, Müqəddəs Quranın Nəşri Fondu və 6-cı Məhəmməd Quran radiosu və kanalı təqdim edilib.
Müsabiqələr hər gün saat 14:00-dan 20:00-dək keçirilir və möhtəşəm bağlanış mərasimi ilə yekunlaşacaq. Bu mərasim Peyğəmbərin (s) mövlud ildönümü ilə eyni vaxta təsadüf edəcək.
Bu dəfəki yarışlar ərəb, islam və afrika ölkələrini, həmçinin Avropa və Asiyadan iştirakçıları təmsil edən seçilmiş hafizləri, qariləri və Quran müəllimlərini mərakeşli qarilərlə bir araya gətirib.
4302043
