Qurani-Kərim üzrə Ümumhind Müsabiqələrinin keçirilməsi Dehlidə
“İQNA”-nın İslam Mədəniyyəti və Əlaqələr Təşkilatının ictimaiyyətlə əlaqələr şöbəsinə istinadən verdiyi xəbərə görə, bu böyük Qurani-Kərim tədbiri İranın Hindistandakı mədəniyyət attaşeli, İraqın mədəniyyət attaşeliyi ilə əməkdaşlıq çərçivəsində, ilahi maarifin təbliği, Hindistan müsəlmanlarının vəhy kəlamı ilə daha çox ünsiyyəti və İslam vəhdəti mədəniyyətinin yayılması məqsədilə, sentyabrın 9-dan başlayaraq iki gün müddətinə İran Mədəniyyət Evinin Hüseyniyyəsində keçiriləcək.
Bu mərhələdə Hindistanın 15 müxtəlif əyalətindən 200-dən çox iştirakçı qeydiyyatdan keçib. İlkin seçim və münsiflərin ilkin qiymətləndirməsindən sonra 75 nəfər seçilərək final mərhələsinə vəsiqə qazanıb. Onlar Qurani-Kərimin tam hifzi və qiraət üzrə yarışacaqlar.
Dehlidə keçiriləcək Qurani-Kərimin hifzi və qiraəti üzrə 26-cı ümumhind müsabiqəsi İran, Hindistan və İraqdan dəvət olunmuş beş tanınmış beynəlxalq münsifin iştirakı ilə baş tutacaq. İki münsif İran İslam Respublikasından, iki münsif Hindistandan, bir münsif isə İraqdan olacaq və onlar iştirakçıların qiraət, səs, üslub və təcvidini qiymətləndirəcəklər.
Müsabiqələrin açılış mərasimi sentyabrın 8-də, bazar ertəsi günü, səhər saat 10-da Dehlidə yaşayan dini və mədəni şəxsiyyətlərin, Quran müəllimlərinin və müsəlmanların iştirakı ilə keçiriləcək. Mərasimdə çıxış edən natiqlər gənc nəsil arasında Qurani-Kərimin təbliğinin əhəmiyyəti, Qurani-Kərimin İslam dünyasında vəhdət yaradan rolu və Həzrət Peyğəmbərin (s) mənəvi məqamı barədə danışacaqlar.
Bağlanış mərasimi isə sentyabrın 9-da, çərşənbə axşamı günü, saat 19:00-da Həzrət Peyğəmbərin (s) mövlud bayramı ilə eyni vaxtda İran İslam Respublikasının Dehlidəki Mədəniyyət Evinin Hüseyniyyəsində keçiriləcək.
Bu mərasimdə qaliblərin adları açıqlanacaq, birincilər mükafat və fəxri diplomlarla təltif olunacaqlar. Həmçinin Həzrət Peyğəmbərin (s) mövludu münasibətilə mədəni və bədii proqramlar da təqdim ediləcək.
Hind yarımadasının ən mühüm Qurani-Kərim tədbirlərindən biri sayılan bu müsabiqə, Quran təcrübələrinin mübadiləsi, İslam ölkələri arasında mədəni və dini əlaqələrin möhkəmlənməsi, habelə müsəlmanlar arasında sülh, mənəviyyat və həmrəyliyin təbliği üçün böyük bir fürsət hesab olunur.
4303651
